Shilong, Naitung 29: Ka KSU Photjaud Rangthong Unit kan pynkup burom ia ki samla kiba la pass bha ia ki examin jong ki ha ka examin SSLC, HSSLC, Ia ka Graduate bad Post Graduate na ka bynta jong u snem 2017, kane ka jingai khusnam kan long tang ia kito kiba la ioh 60% shaneng.
Ia kane ka jingai khusnam la tip kum ka Maitshphrang Academic Award, 2017. Na ka liang jong ka seng ka khot ka wer ia baroh kito ki samla pule jong ka tei ka thain kiba hap hapoh jong tei ka unit, ka Rangthong, Photjaud, Mawmerang bad Mawthanrew ba lada don ki samla pule kiba la poi katkum katei ka percentage ba kin phah iaki kot ki sla sha ki nongialam jong ka seng shuwa ka 10.8.2017.
Ka jingthmu jong ka seng ban ai ia kane ka khusnam ka long ban pynshlur ia ki briew jong ka thain ba kin dang lah ban leh shitom ha ka jingpule ka jong ki kum ka jaidbynriew, bad ha ka juh ka por ban kyntu ia ki samla kiba la nang la stad ban tynrong lem ia ka khia ka shon jong ka jaidbynriew.
Haka juh ka por ban pynrung ia ka mynsiem ieit Ri la kyntu ia baroh ki skul kiba don hapoh kane ka thain ba kin pynrwai ia ka jingrwai shuwa ban long skul “Ri Khasi Ri Khasi” ka ban long kum ka jingrwai kyrsiew thiah ia ka jaidbynriew.Kane ka long katkum ka kyrwoh kaba la phah da u Bah Everwell Robin Thongi president jong ka KSU Rangthong Unit.
