Shillong, Iaiong 19: Ka KSU South West Khasi Hills District ka la kyntu iaki bor District jong ka South West Khasi Hills District bad iaki bor pyniaid jong ka Mawsynram Community and Rural Development Block East Khasi Hills District ban lum iaki nongialam shnong , ki seng bhalang, ki seng niam bad kiwei kiwei halor u COVID -1
9.
Naka liang ka seng ” Ngi kwah ban kyntu iaki bor pyniaid ka South West Khasi Hills District bad jong ka Mawsynram C&RD Block ban leh ia kane khnang ban ioh iaka jingiatrei lang ba pura halor une u khniang jingpang. Ym tang katta kane kan iarap ruh iaki bor sorkar ban sngewthuh kham shai iaki jingeh jongki shnong kiba ki iakynduh ha kine ki por kumba la leh lem da kiwei ki District jongka jylla”.
Ka KSU ka sngew kum ka seng ba kan nang iarap shuhshuh haka jingiakhun pyrshah ia u khniang jingpang corona virus. Shuh Shuh naka liang ka seng ka la lap ba kiba bun ki paitbah kim pat da sngewthuh kham shai halor kumno ban iada ia ka jingsaphriang jong u COVID -19 bad kum ka seng ngim Kwah ba ki shnong ne ki paitbah kin kulmar jingmut halor kane ka bynta.
Kumta, naka liang ka KSU ka kwah ban kyntu iaki bor District ka South West Khasi Hills District bad East Khasi Hills District ba ki dei ban phah iaki Sector Officers ban pynshai ne ban print daki kot lyngkdop ban phah sha ki shnong ba kham kyndong jongka South West Khasi Hills District bad Mawsynram Block khnang ba ki paitbah kin sngewthuh khamshai.
Hooid naka liang ki bor sorkar ki la pyrshang ban pynshai hynrei haka jingiohi ka seng ngi dang i donkam ba kin leh kham bniah. Kiba bun ki paitbah nongkyndong kim pat shai bha halor kumno ban iada ne wat ban dispose iaki masks ba la pyndonkam, Kim pat sngewthuh shai kiba kumno kita ki dak, kumno ban leh iaka self quarantine ba kan pyllait iaka jingshah ktah lang ha ing ha sem bad ki dang donkam ban ioh jingpynshai kham bniah shaphang kumno ki ing ki sem ne ki shnong ki thaw kin leh lada don ka jingsuba ba don kiba don ia kane ka jingpang ha ing ne ha shnong ha thaw khnang ban lait naka jingiabit.
Kum ka seng kala ioh ban iakren bad ka Deputy Commissioner jongka South West Khasi Hills District halor kane ka bynta bad ngi ngeit ba in shimkhia halor kane ka mat. Ngi kyntu ruh ia ka DC jongka East Khasi Hills District ne ia BDO jongka Mawsynram C&RD Block ban shimkhia kumjuh halor kine ki bynta ba ngi ai jingmut na bynta ka jingmyntoi bad ka jingsngewshngain jongki paitbah.
Ka seng ka kyntu ruh iaki paitbah ba kim dei ban tieng bad Wat ai ba ka jingiatiplem kan duh noh hapdeng kane ka jingeh hynrei ngin iatreilang bad ka tnad ka Koit ka Khiah bad ki bor sorkar khnang ba ngin jop iaki jingeh. Kane ka dei ka kyrwoh na u samla Forwardman Nongrem, President, KSU South West Khasi Hills District Unit.
