Shillong, Jymmang 24: Kum shibynta ban pynsngewthuh ia ki paidbah ha kaba ia dei bad ka pisa pilain na ka liang jong ka Reserve Bank of India (RBI) Shillong, ka la pynlong ia ka jinghikai ia ki paidbah hapoh jong ka shnong Mawkhlam-Nongpyndeng ha West Khasi Hills District Nongstoin.
Na ka liang jong ka RBI, ha kane ka jingai jinghikai kila pynshai ia ka jingtrei kam jong ka RBI bad la pynsngewthuh ruh ia ki paidbah ba kim dei ban iathuh ei ei sha ki briew kiba phone ia ki lada ki kylli ei ei ha kaba ia dei bad ka Bank Acount jong ki. Ha kane ka sngi la batai ruh ia ki briew ban sngewthuh ia ka pisa kaba la pynmih da ka RBI.
Ha kane ka sngi la sam ruh ia ki jingai sngewbha sha ki seng trei mon sngewbha kiba la wan ban ia shim bynta kum ka Mawtynrong SHG, ka Mawkhlam SHG, Diengngam SHG. Ha kane ka sngi la ai jinghikai ha kaba ia dei bad ki kam kumno ban pynaid ia ka pisa pilain. Ia ki jingbatai kiba bniah lah ban leit sha ka website jong ka RBI. www.rbi.org.in.
Na ka liang jong ka RBI kiba la ia don ha kane ka sngi ki long u P. Gangte, Deputy General Manager, RBI Shillong, u L. Hangmuanthang, Asst General Manager , RBI Shillong, u Utpal Bezbaruah, District Development Manager NABARD Nongstion, u Th. Tunglut Suan, LDM SBI bad kiwei kiwei de ki briew na ki bank bapher bapher ki don kumba 350 ngut ki briew kiba la wan ban ia shimbynta ha kane ka jinghikai.
