Shillong, Naiwieng 25: Ka Synjuk Ki Rangbah Kur Ka Bri-Hynniewtrep ka pynpaw ia ka jingsngewsih kaba khraw ban iohi ba hynriew tylli ki mynsiem briew kila duh ei ia ka jingim ha kti ki pulit ka jylla Assam ha ka jingsiat pathar ia ki riew paidbah ha shnong Mukroh ha West Jaintia Hills District ha ka 22/11/2022 mynta u bnai, ka synjuk ka pynrem jur ia kito kiba don kti ban siat ia ki riew paidbah.
Ka seng ka phah ia ka jingsngewlem sha kiba ha iing ha sem jong ki san ngut kiba khlad kiba dei na ka shnong Mukroh, ha kajuh ka por ka duwai ba u trai nongbuh nongthaw ba un ai ka jingjah thiat bym juhkut ia ki mynsiem kiba la khladnoh.
Halor katei ka jingjia ha ka shnong Mukroh la ioh lyngba ki lat pathai khubor ba ka sorkar Meghalaya bad sorkar Assam kila dep ban ia kren bad u myntri kam poh iing u Amit Shah ban phah tohkit ha ka Central Bureau of Investigation (CBI).
Na ka twitter jong u myntri rangbah u Conrad K Sangma kala paw shai kdar ba u mytnri Kamp oh iing ka sorkar pdeng u Amit Shah u la kubor ban phah tohkit ha ka CBI halor ka jingshah siat ki riew paidbah ha shnong Mukorh.
Ka Synjuk ka kyntu ia ki samla ka Ri ban long kiba jai jai bad rangbah ban kiar na ka jingia umsnam namar kam pynpoi shano shano bad ka shu buh jingeh pynban ia ki ba duk ba rangli. Ngi kyrmen skhem ba ka jingtohkit da ka CBI kan long kaba ai jinghun ia baroh, kane ka long katkum ka kyrwoh kaba la phah da u bah Herman Nongrum Presdient bad u bah Aristotle Lyngdoh General Secretary.
