Shillong, Lber 16: U Chairman bad managing director jong ka Uranium Corporation of India Limited (UCIL) u C K Asnani ryngkat bad ki ophisar na ka UCIL bad jong ka AMD, kila ia kynduh ia ki seng bhalang na kane ka jylla Meghalaya ha Pinwood Hotel Shillong ban ia kren haba shit bashai khlem riej halor ka kam tih Uranium ha kane ka jylla Meghalaya,
U Genenral Secretary jong ka seng Hynniewtrep Youth Council (HYC) u Bah Robert K Jahrin haba kren ha u SP News Agency, u la ong ba na ka liang jong ka seng kala kren shai kdar ba namar ba ka UCIL kam lah ban ai jingshai ban iada na ka jingsniew kaba mih na u Uranium ka seng ka pyrshah ia kane ka jingthmu tih Uranium ha kane ka jylla.
La ong ba namar ba u Asnani, u la kren shai sha ki seng bhalang ba kin kren ia kaei kaba ki don khlem riej ia kaei kaba ki kwah ban kren, na ka liang jong ka HYC kala kren shai kdar ba “Uranium u dei u nong rah ktien jong u shabi sha ka jingiap”.
Ka jingshong syier jong ki paidbah ka long ba ka UCIL haduh mynta kam shym la lah ban ai kano kano ka jingshai ban pynthikna ba lah ban iada, na ka liang jong ka HYC kala kren shai ba kane ka long jong ka jingpyniap suki jai lada tih Uranium.
Haba ia dei bad ka kam pynkynriah shnong ia ki briew ka long kaei kaei kaba eh ia ki briew, kum ka jaidbynriew khasi kaba don ka jingiadei ha pdeng kiba iap bad kiba im, ia kane ka jingiadei kaba yn nym lah ban pyniakhlad, wat la kane ka jingtih Uranium kam pat sdang ia jingiakynad kala mih hapdeng kiba kyrshan bad kiba pyrshah.
Na ka liang jong ka HYC kala kren shai kdar ha kane ka jingiakynduh markhmat bad u tei u heh duh jong ka UCIL ba kin sngewbha ban pynkut noh ia kane ka jingthmu tih Uranium ka jong ki na kane ka jylla Meghalaya.
U Bah, Samuel Jyrwa Chairman NESO, u la ong ba ha ha kane ka jingiakynduh mynta ka sngi na ka liang jong u CMD u la pyrshang la ka buid ka bor ban pynmunjur ia ki ba ka UCIL kan sa shim ia baroh ki lad jingiada, hynrei ki sngew ba haduh mynta kam pat don kano kano ka jingiada kaba lah ban iada na ka jingsniew kaba lah ban mih na u Uranium. Laong ba ka UCIL ka dei ban pynsngew sha ki bor jong ka sorkar pdeng ba ka dei ban pynkut noh ia kane ka jingthmu tih Uranium na kane ka jylla.
Na ka liang jong ka KSU ruh kala pynpaw ia ka juh ka jingsngew ha kaba u president ka seng u Bah Lambokstarwell Marngar u la ong ba ka seng kan iai pyrhsha beit ia kane ka jingthmu tih uranium na kane ka jylla Meghalaya. Kiwei ki seng bhalang kiba la ia poi sha kane ka jingiakynduh mynta ka sngi ki long ka Joint Action Committee of Social Organization (JACSO), Langrin Youth Welfare Association (LYWA) and Meghalaya People Human Right Commission.
Haka jingkren sdang na ka liang jong u CMD jong ka UCIL u la ong ba kane ka jingiakren kaba mynta ka sngi ka dei ban long beit haba shit ba shai, bad la ong ba na ka liang jong ka UCIL kan dang iaid beteng ia kum kane ka jingiakynduh ban ia kren halor kane ka kam tih uranium ha ki por ki ban sa wan ruh.
