Kyntu u Bah John ia ki MDC ka Hima Mylliem ban ia kren shai halor ka Mylliem Act

Shillong, Naitung 19: U Bah John F Kharshiing mynta ka sngi u la thoh shithi sha baroh 15 ngut ki MDC jong ka hima Mylliem bam ia kren shai halor ka Mylliem Act. Ka jingdonkam Kyrkieh ia ka Committee MDC Hima Mylliem ban ioh ki Act ki Rule kiba shai kumno ban lum Dorbar kut snem hapoh Shnong, Raid ne Hima shisien shi snem ha ryngkat u Khun u Hajar katkum ki Riti Dustur Hima.

Halor katei ka phang kaba la kdew haneng, ngi sngewdei ban kyrpad ia phi ban shim khia ban thaw lad ban lum ia ka committee kaba kyrpang jong ki MDC Hima Mylliem, kum shibynta ban ioh ban iakren ban pynneh pynsah bad ban nang pynjanai ia ki Act 2007-2008, ki Rule 2015 jong ka Hima Mylliem kaba dei u klong snam jong ka Ri Khasi Jaintia bad khamtam ba ha kane ka Hima ka don ka Nongbah Shillong.

Haba ngi bishar mynta ha une u snem 2019 ia ki jingeh kiba ngi ki khun ki hajar ngi ia kynduh ha ka synshar khaddar hapoh u pud u sam ka Hima Mylliem ngi shu sah  ha ka umdum namar ym shym don ba shim khia ban lum ia ka “Dorbar Hima” jong ka Hima Mylliem.

kynmaw dang shen u Bah HS Shylla, CEM barim ula pyrshang ban lum ia ka Dorbar Hima Mylliem hynrei ha kato ka jinglum ka la long ka jinglum kaba kyrkieh ha kaba mangi ki khun ki hajar ngim shym ioh ban ia shim bynta ban ia ai jingmut kumno ban tei ban pynjanai ia ka Hima Mylliem katkum ka jingkylla jong ka por. Ngim shym ioh ruh ia ka kaiphod kut snem kaba dei ban kynthup ia ka jingkhien jingdiah ka kaiphod treikam na ka Executive Dorbar Hima Mylliem, bad ruh ka kaiphod na ki Kur synshar ka Hima Mylliem,  lehse namar ba dang shu wan u Acting Syiem uba thymmai.

Kum ka nuksa ngim shym ioh ban ia kren ha ka Dorbar Hima ia ki jingeh kiba mih haba ka Ain Ri India ka Forest Conservation Act 1980, ka khang bad kam shah ban plie kharkana dieng lait noh tang ha kawei ka Industrial Estate ha baroh kawei ka Hima kaba la pynduh kaba la khang ia ka Trade jong kiba bun ki trai shnong, katba kiba ioh ha kita ki Industrial Estate kiba bun ki long ki benami lane ki nongwei.

Haba phai sha ka Sor Shillong kaba don hapdeng ka Hima Mylliem, ngi kyrshan ia ka jingkren u Dr Jemino Mawthoh dang shen ba ka Sor Shillong ka don ha ka jingma ba ka sor Shillong kan khyllem noh lada ka Sorkar Jylla ka KHADC kim leh ei ei.

Lada ngin dang ia kren kumno ban pynbha ban iada ia ka Ri bad ka jaidbynriew Khasi la donkam ban sdang shuwa na ka thymmei ka jingsynshar tynrai Shnong, Raid bad Hima. Kumba long mynta ki Act 2007;2008 ki Rule 2015, jong ka Hima Mylliem kim kren shai ha kawei ka liang ka ong dei ban lum Dorbar Hima shisien shisnem hynrei ha kajuh ka por kam don ka jingbatai kumno u khun u hajar un leh lane aiu ka KHADC kan leh ha ki Act ne Rule Hima lane wat ha ka Act 1959 haba ki Shnong, Raid ne Hima kim lum Dorbar Hima.

Ka jingpyrta shaphang ka jinghuri hura hapoh Them Mator, katno ka long kaba lyngoh ba ki mih ar tylli ki dulir kiba kam trai ia ka khyndew lyngba ki dulir Hima Mylliem, shuh shuh ki samla seng bhalang ki iaid man ka por ban khynra Trading License hynrei ha kawei ka liang kam don kano kano ka jingiakren sani bha ha ka Dorbar Raid Mylliem ne Dorbar Hima Mylliem ha kaba ia dei bad kane ka phang ki Dorbar Shnong katkum ka jingsngewthuh jong ki, ki nang ai NOC Trading License khlem kano kano ka jingpynbeit ka policy kaba shai hapoh Dorbar Shnong halor ki jaka plie dukan kaba ngi la dei ban ia kren ha ka rynsan jong ka Dorbar Hima.

Ki Dorbar Shnong, Dorbar Raid ki Dorbar Hima, khamtam ka Dorbar Hima Mylliem ki la dei ban pynlong ka jingjiakren kaba shai ban don ka policy halor hangno yn shah ia ki jaka kiba ngin mang jaka iew jaka plie dukan (commercial ) lane hangno ngin mang jaka shong jaka sah (residential), ki jaka ialeh kai (Sports Grounds) ngi donkam ia kitei ki bor kynthup ki MLA, ki MDC, ka sor bad khap sor ban pynshai halor kane ka phang, ia kaba ka tnad Elaka, Trade, Planning, bad kiwei kiwei ki tnad KHADC, ka la dei ruh ban pyrkhat ia kane ka phang, bad ki dang bun kiwei kiwei ki bynta kumno mangi ki khun ki hajar ngi duhnong haba ki bor KHADC ki MDC Hima Mylliem kim shim khia ban  pyrkhat halor ka jingbym ioh Dorbar Hima.

Kham mynshwa ngi don tang kawei ka iew ka basa,Lada ngim shim khia ki ba bun ki jaka hapoh Khasi Jaintia Hills  kin sa kylla dhen Kali, Kum ka nuksa nalor ka Sor Shillong, ngi lah ban ong ba ha Mawlai-Mawiong, Nongstoin, Kynshi, Lad-Nongkrem, Smit, Mylliem Bah, Lai Mer, Rynjah, Lad Pohkseh, Nongthymmai, Madanryting, Sohiong, Mairang, Mawngap, Mawkyrwat, Patharkhmah, Mawhati, Bhoirymbong, Mawryngkneng, Jowai, Khliehriat, Lad Rymbai, Dawki, bad kiwei kiwei ki jaka kin sa kylla long “iewduh bad kum ka khyndai lad”.

Hato ki Dorbar shnong, Sorkar Jylla, KHADC,  ki lah mo ban ai jingmut halor kumno ban khang, ne kynriah, noh katto katne ki dukan, ki skul, ki hospital, ki jaka bam, ki ATM, ki office Sorkar, hato ngi lah mo ban khang iaid Kali bad pyniaid noh tang da ki BUS ha kylleng ka sor Shillong khnang ban ioh lad ban kham sted ka iaid kali lane ban suk iaid kjat. Ban lait ka dheng Kali ngi ki paidbah ngi donkam ban nguid u dawai uba kthang ban lait ka dheng Kali.

Kumta, halor kitei ki mat kiba la kdew haneng, ngi kyrpad ia phi kum u Executive Member, i/c Trade, KHADC bad khamtam kum u MDC Hima Mylliem ban thaw ka lad ka lynti ban lum ia ka Committee kaba kyrpang jong ki MDC Hima Mylliem kiba don kumba 15 ngut ban ia kren halor kane ka phang. Lada donkam ia ka jingai jingmut na ka liang ki riewkhmat ngi long kiba kloi ban synniang kumno ban pynbeit ia kitei ki kam.

 

 

 

 

 

What Next?

Recent Articles

Leave a Reply

Submit Comment

*