Shillong Naitung 11: Ka phang pdeng jong mynta u snem ban rahkhe ia ka ‘World Population Day’ ka buh ba kan long ‘ ka jingkhih ksar ba thymmai, ka rukom ngeit kaba thymmai, ka iing ka sem kan kiew da ka jingdon ia ka jingkit khlieh’. Ia kane ka jingrakhe la pynlong mynta ka sngi ha Mawphlang PHC, kaba hap hapoh jong ka Mawphlang C&RD Block , kane ka jingthmu ka long ban hikai kumno ban pynneh bad ban iada na ka jingkiew palat ka jingbun paid ha ka Ri bad ban ia ryngkat dor bad ka ioh ka kot jong ka Ri.
Ia kane ka jingai jinghikai la pynlong da ka ophis jong u District Medical bad Health Officer, East Khasi Hills District , ha kaba u Bah K. C. Khyriem, Parliamentary Secretary Tourism, ha ka juh ka por u dei ruh u MLA jong kane ka jaka u la long u kongsan ha ka jingiadon ryngkat u Bah L Blah MDC ka Dr. E. Dkhar, DMHO, Dr. J. B. Ranee, DMCH Officer, ha ryngkat ki khynnah skul jogn katei ka thain.
Kane ka jingrakhe ia ka jingbun briew ha ka pyrthei la juh rkahe shibnai lynter ia kaba la sdang naduh ka 27 tarik jong u bnai Jylliew bad pynkut ha ka 10 tarik Naitung bad naduh ka 11 tarik Naitung haduh ka 24 tarik jong une u juh u bnai la juh pynlong ia bun ki jinghikai bad ki jingpynsngewthuh paidbah ha kaba ia dei bad kane ka phang kumno ban ia leh ban pynduna ia ka jingioh khun da kaba pyndon kam ia bun ki lad ki lynti kiba don bad ka tnad ka koit ka khiah.
Haba kren ha kane ka sngi kum u kongsan na ka liang jong u Bah Kennedy C Khyriem ula kyntu ia ki paidbah ba kin shim ia ka kabuh kaba don bad ki jaka ai jingsumar jong ka sorkar ha kaba ia dei bad ka koit ka khiah bad kum juh ba ki briew kid ei ban tip ia ka jingdon kam ban pynduna khun, na ka bynta ban ioh ia ki khun kiba shait ba khiah, ha ka juh ka por la lyntu ia ki paidbah ba kin pynrung kyrteng ia lade hapoh jong ka MHIS ba kin ioh ia ka jingiarap haba ki leit ban shah sumar ha ki hospital.
Ia kane ka juh ka jingrakhe la pynlong long ha Jowai, hapoh jong ka Jowai District Hospital ha Ialong. Ka District Health Society, West Jaintia Hills kala pynlong ia kane ka jingrakhe hapoh phyllaw jong ka hospital ban pynsngewthuh ia ki paidbah kumno ban leh ban ioh ia ka iing ka sem kaba koit ba khiah.
Ha kane ka jingrakhe kiba la ia don long ki long ka Dr. M.Talang, Joint Director, Health Service, Dr. S.S Nongbri, DMHO, Jowai, Dr. (Mrs) L. Challam, Medical Superintendent, Jowai, Dr. S. Sumer, Gynaecologist, Dr. (Mrs) V. Laloo, ba dei peit ia ka MCH Officer lem bad kiwei kiwei de ki riew rangbah.
