Shillong, Nailur 17: Ban betin lynti iaki khun samla haki ba bun ki liang ka Sacred Hearth Theological College (SHTC) Mawlai mynta ka sngi kala pynlong ia ka ‘ Youth Fest 2017’ kaba ki juh pynlong man u snem bad ka ktien phira jong mynta u snem ka long “Ki samla kiba bha na ka bynta ka long iing kaba bha”. Ha kane ka jinglehkmen kumba 600 ngut ki samla kila ia poi na kylleng ka sor Shillong kaba kyntup ia baroh ki jaidniam.
U Deputy Inspector General jong ka tnad pulit jong ka Central Reserve Police Force (CRPF) u Marianus Minj, ha ka jingkren ka jong u sha ki samla ha kane ka sngi u la ong ba wat shah ki jingpyrkhat ba sniew kan synshar ia ka jingim jong phi, long kiba shisha ha lade.
Na ka liang jong u DIG u la ai mynsiem ia ki samla ha kaba u la long ba ki samla barabor ki ialam na khmat, long ki briew kiba bha bad phim kiew ha ka long briew man briew ha ryngkat ka jingdon ia ka jingnang jingstad, u la ong “ Ngi long shipara to ngin ia burom markylliang kum ka iing ka sem ban gin ioh ia ki samla kiba bha”.
“Ban long kiba jop ha ka jingim jied ia ka kam ba kwah ban trei, haba la jied beh sha ka thong, trei shitom da ka jingkut jingmut, haba la don ka jingkut jingmut shiteng na ka kam la dep ban jam, ka buit ka synshar ia ka pyrthei bad ka jingpyrkhat ka synsahr ia ka jingim briew” la ong u Marianus.
U kyntu ia ki samla kiba don ha kane ka jingleh kmen bad kin shaniah ialade, haba don ka jingshaniah ngeit ha lade, ieit ia lade bad kynmaw nyngkong ieit ia lade bad leh ia kaei kaei da ka jingshida bad pyrkhat tang ia kaba bha da kane phin poi sha kathong kaba u ne ka samla ki angnud ban poi sha ka thong.
Kane ka jingleh kmen ka dei kaba juh pynlong man u snem da ka SHTC ia ki samla, ha ka por jan miet kala don ka jingpyni ia la ki jong ki riti dustur ha ka riam ka beit ka shad ka kmen jong ki jaid bynriew kane ka dong bad ka thain ha kaba u Director HRD jong ka North Eastern Council u Siile Anthony u la long u kongsan.
