Kyntu u Lamphang ïa ki MLA ban ïasnohkti lang ban ïakhun pyrshah ïa u COVID-19

Shillong, Lber 26: U Lamphang ka ïingdorbar thawaiñ ka Jylla, u bah Metbah Lyngdoh mynta ka sngi u la kyntu ïa ki 60 ngut ki MLA ka jylla ba kin ïasnohkti lang bad ki bor sorkar ha kane ka por jong ka jingïaleh pyrshah ïa u khniang jingpang Coronavirus.

“Kadei ka por jong ngi baroh ki MLA ban khmih bniah halor ki jingduna kiba don hangne hangtai na kane ka jingdon jong u khniang jingpang Coronavirus bad haba don ka jingduna, ki don ïa ka hok ban ai jingmut sha ki bor sorkar,” ong u Lamphang ka ïingdorbar thawaiñ.

Haba kyntu ïa ki paidbah, u bah Metbah u la ong, na ka daw ka jingpur bad saphriang sted jong u khniang jingpang Coronavirus (CoVID 19), nga buh ka jingkyrpad sha ki paidbah ba kin long kiba husiar na une u khniang jingpang bad ban nym shim sting halor ka rukom im ka jongphi.

Haba ïadei bad ka jingud jingnam jong ki paidbah halor ka jingeh kaba ki kynduh ha ka liang ki marbam bad kiwei kiwei khamtam hadien ka jingpynbna jong u Myntri Rangbahduh ka Ri ïa ka jingkhang dam kaba 21 sngi bad ka jingpynjari jong ka sorkar jylla, u bah Metbah u la kyntu ïa ki MLA ba kin peit bniah ïa la ki jong ki konstitwensi khamtam ban peit ba ki paidbah kin nym ïakynduh jingeh.

U Lamphang ka ïingdorbar u la ai khublei ïa u myntri rangbah ka jylla u Conrad K Sangma bad ki myntri sorkar, ki ophisar rangbah ka jylla, ki ophisar ka tnat ka koit ka khiah, ki doctor, ki nurse, ki ophisar jong ki bor pyniaid distrik kiba don bynta ban peit ïa ka bha ka miat, ki ophisar na ki tnat bapher bapher, ki lad pathai khubor kiba don bynta ban pynsaphriang ïa ki khubor kiba thikna sha ki paidbah, ki bor pyniaid shnong, ki nongdie dukan kynthup ïa ki pharmacy bad kiwei kiwei.

Shuh shuh, u bah Metbah u ong ruh ba u buh ka jingduwai ba baroh ki nongshong shnong ka Jylla kin ïa don ha ka met kaba koit kaba khiah bad ban long kiba khlain ban ïakhun ïa une u khniang jingpang COVID 19.

 

What Next?

Recent Articles

Leave a Reply

Submit Comment

*