Shillong, Jymmang 25: U myntri ka tnat Pule Puthi u Rakkam A Sangma hynne ka sngi ula kyntu ia u nongialam ka Voice of the People Party (VPP) u bah Ardent M Basaiawmoit, ba un pynkut noh na ka jingpynbteng ia ka jing shah jingit ba khlem pud namar kane ka lah ban wanrah ia ka jingktah kaba jur bha.
U Rakkam haba kren halor ka jingiakhih u bah Ardent kaba la iaid mynta 3 sngi tam. U la ong “Ngi ialehkai ba ka ding mynta bad kan sa pynpdung ding ia baroh, kynthup ia ka VPP bad kan sa pynjot ia ka lawei jong ki khun samla jong ngi” la ong u Rakkam haba kren halor ka jingiakhih u bah Ardent kaba la bteng mynta 3 sngi tam.
U Rakkam u la ai nuksa na ka mukotduma ba la Jia ha u snem 2014 ha Maharashtra, ha kaba ka ïingkashari Supreme Court ka la pyniap ia ka Ordinance ba la pyntreikam da ka sorkar jylla, kaba mang tam ia ka bhah ba 50% sha kawei ka Jaidbynriew riewlum. Ka ïingkashari ka la pynmih ia ka Circular sha baroh ki jylla kynthup ka Meghalaya, ba dei ban sam bhah ym palat ia ka 50%.
Shuh shuh u la ong “Ngi don ha ka jingma namar ka Meghalaya mynta ka ioh haduh 85% ka bhah ia ki paid riewlum, ha kaba 80% la sam sha ki Khasi-Jaintia bad Garo katba 5% la ai sha kiwei ki paid riewlum. Haba ka Iingkashari Supreme Court ka la pan jubab na ka Jylla, ka Sorkar Meghalaya ka la ai ia ki daw ba pynksan halor ka bhah ba 85% mynha ka 27 tarik Lber, 2021. Hynrei, ka rai jong ka Supreme Court halor kane ka kam ka dang sahteng haduh mynta”
U Rakkam ula kdew ba ka ïingkashari kala ai rai ba kano kano ka Job Reservation Policy bad Appointment Policy kam dei ban tam ia ka 50% ka bhah.
U la maham ruh da ka “Ka jingpynbteng ia kane ka drama ka lah ban lam sha ki jingjia ki bym lah ban tip, bad lada ia ka reservation policy jong ngi la pyniap noh, dei ma ngi kiba hap shim ia ka jingkitkhlieh. Kane ka dei kaba la jia teng ha ki snem ba la leit noh. Lada kum kine ki jingjia ki wan jia, ki pateng jong ngi kin nym map satia ia ngi”. U la ong.
