Shillong, Jymmang 24: U bah Staising Kharbteng u la ong ba ka jingwan ka khlam jingpang Covid-19 ka la pynkyndit ia ka pyrthei baroh kawei ha ryngkat ki jingjia bad jingkylla kiba bun. Ki bor sorkar kylleng sawdong ka pyrthei ki la pyntreikam mardor ia ka jingkhang dam ne lockdown kum shibynta ban tehlakam ia ka jingsaphriang katei ka jingpang kaba la wanrah ia ka jingiap da ki lak.
ka jingshah ktah ha katei ka jingpang da ki milion , ka jingduh kam noh kiba bun balang bad shah ktah ka ioh ka kot ne economy ki paidbah bad khajna ki bor sorkar ha bun tylli ki Ri kynthup ia ka Ri India jong ngi.
Haba bishar bniah ia ki jinglong jingman baroh ngi sakhi ia ka jinglynga bad pisa mynsiem kiba bun balang ha bun ki liang. Haba phai sha ka Ri jong ngi ngi la mad ia ka jingkhang dam kaba la 2 bnai eiei bad ha kine ki por ngi iohi ia ka jingsangeh ki jingtrei kam bapher bapher naduh ki iew ki hat , ka jingiaid ki kali kamai,ki rel, ki liengsuin, ki jingtreikam ba shna jingshna bad kiwei kiwei .
Ka jingsangeh treikam ha bun ki bynta ha kylleng sawdong ka Ri ka la pynlong ia ki nongtrei bylla ba la khot kum ki migrants workers ha ki kam shna jingshna ha ki karkhana , ki iing ki sem, ki lynti ki syngkien bad ha kiwei ki bynta ban leit phai sha la ki jong ki shnong trai .
Ki nongbylla kiba trei ha ki nongbah kum ha Delhi bad ha kiwei kiwei ki nongbah ki iaid kjat da ki spah kilometar ban poi sha ki shnong trai kum sha jylla Bihar, U.P bad sha kiwei kiwei ki jylla.
Kham hadien don kiba la iohlad ban leit phai da ki kali, ki rel bad ruh kiba dang sahkut ha ki jaka ba ki don. Ka jingleit phai ki briew na kiwei ki jaka kylleng sawdong sha la ki jong ki jaka ngi iohi ba ka jur haduh katta katta.
Kane ka rukom leit phai noh ki briew sha la ki shnong trai kam shym la kut tang ia ki nongbylla , hynrei ka la pur sha ki samla pule, ki nongtrei ha ki kompani shimet ne private companies ha baroh ki jylla ka Ri.
La sakhi ba ki briew ka jylla Meghalaya ruh ba kynthup naduh ki samla pule, ki nongtrei ha ki kompani bad ter ter ki la wanphai na bun ki jylla ka Ri . Ha kum kane ka por ngi iohi ia ka jingwanphai noh ki nong India ruh kiba don shabar sha la ka Ri .
Ha kine ki sngi jong ka jingkhang dam la iohi ba ki briew ki mad ia ki jingeh kiba bun ha ka liang kamai kajih, ka koit ka khiah, ka bam ka dih, ka leit ka wan bad kiwei kiwei ki jingeh. Lehse ki jingjia kiba ngi mad namar ka khlam jingpang Covid -19 ki ai jinghikai ia ngi ha bun ki liang.
Haba phai sha ka Ri
baroh kawei bad khamtam sha la ka jong ka jylla. Kawei na ki jinghikai kaba ngi ioh na kane ka jingjia ka long ba ngi donkam ban kyrshan dalade ialade ne self reliant ha baroh ki liang.
La da phai ha ka bam ka dih ka long kaba donkam ba ngi dei ban pynmih bun ki marbam na la ka jylla khlem da donkam than ban shaniah na shabar ban wanrah ne pyndap pynbiang ia ka bam ka dih na bynta jong ngi bad ruh kiwei kiwei ki jingdonkam kiba man la ka sngi.
Ki jingeh ba ki nongrep ki ia kynduh ban pyniaid iew ia ki mar rep jong ki ha kum kane ka por bad jingshah khniot dor ki mar rep jong ki, ka lah ban theh umpjah noh ia ka thong ba ngin lah ban ieng halade.
kyrmen ba ka jingmynjur ka iingdorbar thawain ka jylla ba la wanrah da ka Sorkar ia ka Meghalaya State Agriculture Produce and Livestock Marketing, Promotion and Facilitation Bill, 2020 kan iarap ban weng ia ki jingeh ki nongrep .
Haba ia phai sha ka pule puthi , lah donkam ki skul bah ki ban ai jinghikai ha ki tnat pule bapher bapher ha kaba ki khun samla jong ngi kin nym da donkam than shuh ban da leit pule shabar ka jylla.
Ka jingseng ia ki lad ai kam ai jam na bynta ki khun samla khnang ba kin lait ban leit trei shabar ka long kaba kongsan ba ki nongsynshar nangne shakhmat kin hap ban trei shitom bad khamtam ka jingwanphai noh kiba bun ki briew ka jylla na ki bynta bapher ka Ri ka long ka mat kaba kongsan eh ba kumno kin ioh ki lad kamai kajih hadien ka jingwanphai biang ka jingiaid beit iaid ryntih kiei kiei.
La tip bad sngewthuh shai ba ynda la weng noh ia ka jingkhang dam ki bor synshar ha ki jylla bapher bapher, ha ka Ri bad pyrthei salonsar kin ia kynduh ki jingtynjuh kiba bun kumno ban pynwandur biang ia ka jingiaid beit ki lad kamai kajih bad kyntiew ia ki kam pynroi bad khamtam ban weng ia ka jingkyrduh ne jingduh kam kiba bun balang kiba ngi iohi ia ka jingduh kam kaba kyndit da kiba bun kiba trei ha ki kam jong ki kompani ne ki riew shimet.
Ha kum kane ka por jong ka jingeh ka long kaba donkam ia baroh , khamtam kito ki heh spah ban ia snohktilang bad ki bor sorkar ban ialeh ban kyntiew ia ka ioh ka kot khnang ba ka lad kamai kajih kan ieng rasong biang sa shisien bad ba ngin lah ban pyntyllun ryntih ia baroh ki jingtrei kam na bynta ka bit ka biang jong baroh ki nongshong shnong.
Ki don bun ki jingkylla bad jinghikai kiba ia sakhi ia kiba ym shym lah ban kdew lut hangne kiba ngi mad bad sngewthuh namar ka khlam Covid-19 .
Kawei ka phang kaba dei ban pynkhreh ka long ruh ba shibun ki jingkylla kin wan nangne shakhmat khamtam eh ki polisi ne ki mat treikam ka sorkar ha ka jingpyrshang ban kyntiew biang ia ka economy ka Ri bad kiwei kiwei ki bynta namar ka jingshah ktah ha kane ka khlam , ka eriong Amphan , ka jingshah ktah ka kam rep na bun ki daw bad ruh kiwei kiwei ki jingjia kiba ngim lah ban iohi lypa.
