Shillong, Jymmang 03: 
U Bah C Shangpliang, President, ka seng Hill Farmer Union (HFU), u la phah ia ka shithi sha u Director General ki pulit jong ka jylla ban kyrpad ia u ban thaw ki lad ia ha kaba ki tnad Meghalaya Police kin sngewlem ban thied kyrpang shuwa ia ki mar rep kiba la rep hapoh ka jylla da ki nongrep da kaba ia treilang ryngkat bad ka seng ki nongrep kaba la tip kum ka HFU khamtam ha kum kane ka por kaba ki nongrep ki ia kynduh jingeh kaba khraw ha kaban pyniaid ia ki jingthung kaba ki la trei bad sei da ka um syep.
Kane ka jingkyrpad kaba kyrpang sha ki bor pulit ka long namar ki long ka kawei na ki kynhun tnad sorkar kaba heh duh ki don haduh 6 tylli ki battalion bad ha kawei ka batallion don kumba shi hajar ngut tam ne duna ki shipai tang ha kawei ka battalion bud sa ki pulit reserve ha man ki District bad ruh ka kynhun SF10 bad baroh lang lehse kin don kumba 8000 tam ne duna ki pulit hapoh ka jylla, kine ki donkam mar rep man ka sngi.
Ia katei ka shithi la phah lang sha u Chief Minister, Deputy Chief Minister, Minister ba dei peit ia ka Home, Minister ba dei peit ia ka tnad Agriculture, u Chief Secretary, u Principal Secretary, Agriculture, u Chairman abd Secretary ka Meghalaya Farmers empowerment Commission, ki Advisers ka Hill Farmer Union kum ka jingtip ba kin thaw ka lad halor kane ka phang.
Ha katei ka shithi la phah lang ruh ia ka shithi na ka HFU bad na ki nongrep khamtam kiba na ka thain Umraleng kiba la pynsngew ia ka jingdon u kajor haduh palat shi hajar kilo uba ki la sei bad uba kin dang sei uba kin hap ban die noh hapdeng kane ka National Lockdown.
Ka HFU ka shim ruh kane ka sien jam ban kyntu ia ki Shnong, Raid bad khamtam ki Hima khamtam ki Rangbah Shnong, ki Sordar Shnong, ki Myntri Shnong, Ki Syiem, ki Lyngdoh, ban pynshlur ia ki khun ki hajar ban thied shuwa ia ki mar rep kiba mih napoh ka jylla lajong kum shibynta ban iarap ia ki nongrep jong ka jylla Meghalaya.
Halor kane ka seng ka kyntu ruh ia ki bor KHADC, JHADC bad GHADC ban buh kyrpang ki jaka ki dukan buh jaka die mar rep hapoh ki iew Hima kiban dei tang na ka bynta ki mar rep na la RI kynthup khamtam ia ki marep kiba khlem ai dawai.
