Shillong, Iaiong 20: Ka seng Hynniewtrep’s People Federation (HPF) ka kyrpad ia ka sorkar ba kan map ia ka bailight jong ki paidbah ba kim ioh ban siew ha kum kane ka por ba don kane ka lockdown namar ki briew kim ioh bylla bad ki don ha ka jingkyrduh.
Haba ia dei bad ki ram jong ki kali ka seng HPF ka kyntu ia ka sorkar ba kan pynkynriah ia ka por ban siew namar ba kim ioh ban leit kamai, haba ia dei bad u khaw ka seng ka dawa ba ka sorkar ka dei ban pynioh biang ia ka dor T.1150/- haduh T.1200/- tyngka ha ka 50 kilo.
Na ka liang jong ka seng kala pynpaw ba kumba ka long mynta ka dor jong u khaw kala kot sha ka T.1600/- haduh ka T.1650/- tyngka ha ka san phew kila kane ka pynishai ba ka dor kala kiew sha ba palat bad kane kala ktah ia ki paidbah ba duk ba rangli.
Ka seng ka buh ka jingkylli hato ki briew kiba leit sha Bank ban leit sei pisa don kam ban ioh karpass ne em bad kum juh ia kiba leit shim dawai sha ki hospital ki don kam ne em ia ka karpass.
Ka HPF kala pynsngew ruh ba ka jingeh kiba bun na ki nongrep jong ka jylla ki rep ia u syieng bad ka jingbym ioh ban die ia u syieng kala ktah shibun ia ki nongrep namar ba kim don kamai da kawei pat. Lada ka sorkar kala shah ia u Kwai, tympew ka dei ban shah ruh ia u Syiem ban die.
Haba ia dei bad ka nongrep wat la ka sorkar kala shah ia ki nongrep ban rep hynrei ka jingeh ka long ia u symbai, ka seng ka dawa ba kan pynbiang ia u symbai. Ha ka juh ka por ka seng ka kyntu ia ki paidbah ban kohnguh ia ka jingbtah jong ka sorkar ban bud ryntih ia ka jingpynia jngai, la ong u Bah Justine Kharbuki general secretary ka seng HPF jong ka Ri Bhoi District.
