Shillong, Iaiong 27: Ka seng JSU Shillong Circle ka kyrpad na ki trai ing ba kin iarap ban map bai wai ing shi bnai nabynta ki khynnah pule kiba duk bad ban ym pynpor ia ki ban siew kyrkieh ia ki bai wai.
Ka seng JSU lyngba u President ka seng u samla Treiborlang R Suchen ,u lah ong ba ka seng ka kyrpad sha ki trai ing kiba don ha sorbah Shillong ba kin iarap bad sngewynei ia ki khynnah pule kiba wan na ka longing kiba duk shisha kiba wad jingpule kaba biang hapoh sorbah Shillong.
Ka seng kadon ka jingsngewkhia kaba jur nabynta ki khynnah pule namar ka seng kam kwah ban don ki khynnah pule ban pep noh ia ki jingpule tang namar ba ki kynduh jingeh kum ha kane ka por ba pakhang shnong.
Ka seng ka lah ong ba kum ha kane ka por ka saw ka sian bun napdeng jong ki khynnah pule kidon shisha ha ka jingkordit namar ki kmie ki kpa kim ioh lad ban leit bylla sngi ban pynbiang bad kyrshan shuh namar ba ki hap ban pyndap shwa iaka jingdawa ka kpoh bad ban lait na ka iap thngan kum kane ka por ba pakhang shnong.
U samla Treiborlang R Suchen u lah ong ba ka seng ka kyrpad ia ka sorkar ba kan pyllait ymtang ka bai skul hynrei ka bai klolej ia ki khynnah pule baduk bad ka seng ka kyrpad ruh iaki trai iing ba kin don lem ka mynsiem sngewlem ban map shipor ia ka bai wai iing jong ki khynnah pule.
Kiba wan na ki longiing baduk bad ban nym pynduh lad ia ka jingpule jong ki ha kum kane ka por ka pyrthei ba hiran pisa bad kyrduh kam kyrduh jam naka jing wan pur ka khlam Corona virus ha ka ri jongngi.
Ka Seng ka kyrpad jur ia ki trai iing ba kin snoh kti lang bad ban iatreilang bad ka imlang sahlang ha kum kane ka khia ka shon da kaba map iaki khynnah ba duk ban sangeh shwa ka shim Bai wai tang shibnai ha kum kane ka apot.
Ka jingkhang kala lang ia uba bun uba lang khamtam lei ia ki longiing kiba duk ba la shah ktah jur ha ka ioh ka kot namar ka jingpakhang shnong kaba jlan ban iada ia ka jingpur u khniang khlam u Corona Virus. Kane ka long katkum ka kyrwoh kaba la leh da u president ka JSU u samla Treiborlang Suchen.
