Shillong, Naitung 11: U bah Pyniaid Sing Syiem MDC jong ka Sohryngkham mynta ka sngi u la phah da ka jingthoh sha u Martin M Danggo myntri ba dei peit ia ka PWD ban kyrpad ban bethah ia ka tnad ba kan siang rong noh ia ka surok hapoh jong ka shnong Thangshalai kaba don tang kumba 2 KM.
Kane ka surok kaba u Bah Pyniaid MDC jong katei ka jaka u la kyrpad ia u myntri PWD ban siangrong ka dei ka surok shnong ha kaba ki long iing kiba don hapoh katei ka shnong ki don palat ia ka 150 tylli ki thnum iing, kaba kane ka surok kaba don mynta ka dei ka surok khyndew.
Haba ia dei bad kane ka juh ka kam na ka liang jong u Bah Pyniaid u la thoh ha ka 21st Lber 2016 sha ka sorkar, hynrei na ka liang jong ka sorkar haduh mynta kam pat leh ei ei bad mynta na ka liang jong u MDC katei ka jaka u la thoh biang mynta ka sngi sha u myntri ka PWD ban pynkynmaw ia kaei kaba la dep thoh mynshuwa.
Ha kane ka sngi na ka liang jong u Bah Pyniaid u la leit ruh ban ia kynduh ia u Chief Engineer jong ka PWD ban ia kren ia kane ka kam ha kaba na ka liang jong u Chief Engineer u la ong ba un sa ia kren ia kane ka kam bad u myntri ba dei peit ia kane ka tnad sorkar.
