Kyrshan ka FKJGP ia ka jingthmu ban rah ia ka PO na Jhalupara sha jingkieng Umshyrpi

Shillong, Risaw 17: Ka FKJGP Upper Shillong Circle ka ai ka jing kyrshan kaba pura ia ka jingthmu bad jing pyrshang jong u Bah Hamletson Dohling, MLA Mylliem Constituency & Minister Urban Affairs ban rah noh ia ka Jhalupara Outpost sha jingkieng Umshyrpi.

Ka FKJGP Upper Shillong Circle ka sngew ba kam don satia kano kano ka jingeh lada ka sorkar hi ka don ia ka mon ban shimkhia ban pynkynriah noh ia ka Jhalupara Outpost sha jingkieng Umshyrpi namar ba kadei ka jaka ba la shu iehnoh shrah mynta la bun bun snem naduh bala dep ban shna ia ka jingkieng kaba thymmai.

Na ka por sha ka por ka Seng ka ju ioh ia ki jingujor ba ki Nonglehkam bym man ki pynlong ia katei ka jaka kum kawei na ka jaka riehtngen ban ia dih ia bam bad ban ialeh ia ki kam sngewbha bad ha kajuh ka por ka buh ruh ia ka jingma ia ki nongiaid nong ieng kiba ju iaid da ka kjat na ka Footpath khamtam eh ia ki khun samla kynthei bad ki Longkmie ruh kumjuh namar ba ki Kali naduh ki Truck bad kiwei de ki kali rit ki ju pynlong jaka ieng ha kitei ki bynta.

Kumta ka Seng hi ka sngew ba kane kadei ka por kaba biang eh lyngba ka jing shimkhia jong u Bah Hamletson Dohling, MLA Mylliem Constituency ban rah noh ia ka Jhalupara Outpost sha jingkieng Umshyrpi khnang ba kan long ka jing sngain ia ka iaid ka ieng jong ki paidbah bad kumjuh ruh ban pynneh ia ka jinglong trai jong ka Sorkar Jylla ia katei ka jaka.

Ha kawei pat ka bynta na ka liang jong ka FKJGP Upper Shillong Circle ka sngew ba tang ka jingrah ia ka Police Outpost kam pat bit dor satia hynrei dei ban pynkylla noh shisyndon wat ia ka kyrteng ruh na ka Jhalupara Police Outpost sha ka ‘Upper Shillong Police Outpost’ khnang ba ki trai ri trai muluk kin don ia ka mynsiem jong ka jingsngew shngain.

Na ka liang jong ka Seng ka pynpaw ba kan ai ka jingiatreilang bad u MLA jong ka Thain u Bah Hamletson Dohling uba la shimkhia halor katei ka bynta bad ha kajuh ruh ka por ka Seng ka kyntu ia ka Sorkar ba kadei ban leh noh kloi ia kaba donkam, ‘katba ka Sorkar ka pynkhreh ban rah ia ka Police Outpost.

Na ka liang jong ka sorkar  kala dei ruh ban nang iai pynkhreh lypa ia ki kot ki sla bad ia ki jingdonkam baroh ban pynkylla ia ka kyrteng’ bad na ka liang jong ka seng ruh kan iai buddien bad kan iai dawa khlem shongthait ban pynkylla ia ka kyrteng na ka Jhalupara Police Outpost sha ka ‘Upper Shillong Police Outpost’ khnang ba ki paidbah nong shong shnong jong ka thain Upper Shillong hi baroh kawei kin don ka jingsngew shaniah kaba pura ia ka jingshakri jong katei ka Outpost na ka bynta jong ki ha ki por baroh.

 

 

What Next?

Recent Articles

Leave a Reply

Submit Comment

*