Shillong, Naitung 26: U Bah Sainkupar Nongtrai publicity Secretary jong ka seng HNLC ha ka jingpynlait khubor ka jong u mynta ka sngi u la ong ba, kum shibynta ban ia snohkti lang na bynta ban pynim iaka Snam ka Jaidbynriew, Ka HNLC ka kyrshan iaka Bill ba lah mynjur daka KHADC halor ban pynduh iaki hok ki kynthei khasi kiba iohlok shabar ka Jaidbynriew.
Ka District Council ka lah leh ia kaei kaei kaba bha tam na bynta ka jingbit jingbiang jong ki rympei iing Khasi, namar ka iing kaba synshar da kawei ka Long kmie Khasi bad uwei u bym dei u Rangbah khasi kan nym lah ban pynheh pynsan iala ki jong ki khun ki kti haka rukom kaba pura ban ieid iala ka jong ka tynrai.
Kaba kongsan ka long haba ki lah shimti ia u bym dei khasi, iaka jait khasi jong ki ruh ym dei shuh ba kin dang pyndonkam namar ka jait ka dei ka tynrai te kumno kin kren shaphang ka tynrai haba da lade kim sngewthuh kaei kata ka tynrai haba ka jaidbynriew ka don hapdeng ka jingeh ka tynrai.
U Bah Nongtraw u la ong ba ym dei ban klet ba ngi dei tang ka Jaidbynriew kaba ka jingbunpaid ka don tang 7 lakh tam hakhmat ka pyrthei te lada kum kane ka ain kam don khlemartatien yn sa duh noh iaka snam pura tang haka shi pateng ban wan.
Ka KHADC kam dei ban pyrkhat ba tang kane ka ain ka lah biang na bynta ka Jaidbynriew hynrei ka dei ban da shna syndon daka ‘Anti-miscegenation Bill’ ban iada na ka jingshongkha khleh ki khasi khlem da ñiew shiliangkhmat lada dei ka kynthei ne u shynrang khnang ba ngin ioh iaka snam ka Jaidbynriew kaba khlain.
Wat haka hima ki mrad la lap ba ki dang don la ka jong ka jingsngewmrad ha kaba yn nym lap koit ba u hati un shongkha bad ka Dngiem, u kulai un shongkha bad ka Masi ne ka miaw kan shongkha bad u Ksew, hynrei u hati un ia shongkha para hati, ka Dngiem para Dngiem, u kulai para kulai ter ter.
Ka shongkha khleh ka dei ka mat kaba lah wanrah iaka jingtieng, ka jingbym sngew shngain shuh wat iaki Ri kiba rit kum ka Isreal, Egypt bad kiwei ki ri kiba duna ka jingbunpaid. Kumta kane ka mat ym dei tangba ka ktah iaka khaii ka pateng, ka khyndew ka shyiap hynrei ka ktah mationg syndon plak haka longdoh longsnam u khasi. la ong u Bah Saiñkupar Nongtraw Publicity Secretary, HNLC.
