Shillong, Kyllalyngkot 06: Ka Mawsynram Constituency Development Society (MCDS) ka la dawa na u bah Pynshngain N Syiem, MDC ka Mawsynram constituency uba dei u Chief Executive Member (CEM) ka KHADC ba u dei ban khot kyrkieh ia ka Dorbar kyrpang ban mynjur ia ki kyndon jong ka AD Rule ban khanglad ia ki bar jylla ban ioh thep vote ha ka ilekshon MDC hapoh ka KHADC.
Haba iakren bad u bah Diralson Dkhar, President ka MCDS u la ong ba ka seng ka kyrshan ia ka nongrim ba ka KHNAM ka ieng ban dawa ba dei ban pynkylla noh ia ka AD Rule ban nym shah shuh ia ki bar jylla ban ioh thep vote ha ka ilekshon MDC khnang ban iada ia ka jinglong trai jong ka jaidbynriew.
“Lada u bah Pynshngain u ieid shisha ia ka jaidbynriew u dei ban khot ia ka dorbar ba kyrpang namar ka PDF haduh mynta ka don ia ka jingbiang briew ha KHADC ban mynjur ia kane ka ain ba la dawa na ka KHNAM” u la ong.
U Bah Diral u la buh jingkylli ruh ia u bah Pynshngain balei u dang pyni sha ka pyrthei ba u ieid jaidbynriew haba ka samoi treikam ka sah satang shi snem kum u MDC haba ha kine ki 9 snem um leh eiei kane ka pyni ba u kwah ban pynbiej biang ia ki paidbah ba la dei ka por ban thep vote sa ia ka ilekshon MLA.
“Nga kwah banphah ia kane ka khubor sha u bah Adelbert Nongrum, MDC ka KHNAM na Jaiaw constituency ba kito ki ummat jong phi ba phi la iam pait dohnud ha iingdorbar ki longlehnohei namar phi la shah shet ha u bah PN Syiem, kumta nga kyntu ia u bah Adelbert ba um dei shuh ban shah pynbiej biang ha une u MDC ka Mawsynram constituency” u la ong.
Haba iadei bad ka Village Administration Bill (VAB) u la ong ba ka KHADC ka la dep phah sha ka District Council Affairs (DCA) bad la phah ruh sha u Lat ka jylla hynrei u Lat ha jaka ban mynjur u phah pynban sha Ministry of Home Affairs jong ka sorkar India.
U la pynpaw ba lada u bah Shibun Lyngdoh, President ka BJP Meghalaya State Unit u ieid shisha ia ka jaidbynriew u lah dei ban leit iakynduh ia ki nongialam ka BJP ha Delhi ban pyntreikam noh ia ka VAB,ha ka juh ka por u la ai jingkynthoh ia u bah Antonio War, MDC uba la rung sha ka BJP ba kam don jingmut ban rung sha kane ka seng namar um pat pyni wat tang shisien ba un leit kiew sha Delhi ban iakren ia ka VAB.
“Ka BJP haba ka don ka mon ka lah ban phah ia ka T. 133 klur sha ka KHADC hynrei haba kam mon ka shet ia ka VAB, hynrei nga pynpaw hangne ba ngim donkam ia ka spah kaba lah ban duh noh hynrei ngi donkam ia ka ain kaba khlain ban iada ia ngi ki rit paid” u la ong.
U bah Diral u la ong ba ka laisen khaii jong ki bar jylla ka la long laitlan palat namar wat ki briew na Assam ki lah ban wan thied kwai im shaduh sha Mawsynram kane ka pyni ba u CEM bad ka EC kim don jingkitkhlieh ia ka jingwan rung kyrthep ki bar jylla wat sha ka constituency jong u CEM ruh namar kim don por ban peit ia ka laisen khaii.
U la ong biang bakane ka jingwan thied kwai im ki briew na Assam ka la pynioh lad ia ki nongtuh ban tuh kwai ha bri ki briew ban die ha kine ki briew kiba nabar ka jylla.
