Shillong, Jymmang 22: Ka rong ka taw ha ka rwai ka siaw, ka put ka tem, ka shad ka kmen, bad ka sawangka la pynlong da ka shlem khliehduh ha Ri India ba dei khmih ia kane ka liang, ka Sangeet Natak Akademi ha nongbah Shillong naduh ka 19 haduh 21tarik, Jymmang, 2023.
Ha ka sngi plie jong kane ka rong ka taw ba laisngi kynthih ba la nam ka Amrit Yuva Kalotsav la pynphuh pynphieng da u Shri. Phagu Chauhan, Lat ka jylla Meghalaya kum u kongsan.
Ha kane kil don kiwei kiwei ki kynrem ki lyndan ki kynthup ia ka Smt. Sandhya Purecha, Chairperson, Sangeet Natak Akademi, Shri Raju Das, Secretary, Sangeet Natak Akademi, Smt. Monica Chanda, Member, Sangeet Natak Akademi bad ka Kong Silbi Passah kum ka riewtbut ba la ioh khusnam na ka Sangeet Natak Akademi.
Ha kane ka rong ka taw la pynirong pyninam ia ki rwai ki siaw, ki put ki tem, ki shad ki kmen, bad ki sawangka na kylleng ka Ri India. Ki kynhun ba la shah jied na jylla ban shim bynta ha kane ka rong ka taw ki dei u Bah Dajied Sing Kharkongor bad la ka kynhun, ki synran jong I Kong Silbi Passah bad ka Aroha Choir.
Kum shi bynta na ki kam ban kyntiew ia ki sap tynrai ha kylleng ka Ri, ka Smt Sandhya Purecha, Chairman Sangeet Natak Akademi ka la leiot khmih ia ki kynhun tynrai na ki nongkyndong ban khmih ia ki kam ban kyntiew ha la ki sap tynrai. Katto katne ki kynhun ba kynsai ki la shah jied ban ioh jingkyrshan ia ki khynnah bad ia ki nonghikai da ka jingsiew ba manla u bnai.
Kumba arphew ngut ki khynnah na ka Seng Riti Cultural Organisation na Wahkhen kynthup bad ki nonghikai kin sa ioh jingsiew katkum ba la mang da ka sorkar, bad ia ka Pahambir Cultural Club la mang ban kyrshan da ki tiar put tiar tem na ka bynta lai kynhun bad katto katne ki riam tynrai ba donkam ha ka tamasa riti tynrai.
Nalorkata la buhti ruh ban jied katto katne ki nonghikai ki ba tbit bad ki ba la minot bad duriap ha ka liang ban kyntiew ia la ka riti na ka bynta ban thung kum ki riewtbit ban ithuh da ka sorkar kmie da ka khusnam katkum ki kam bakhraw jong kita ki rangbah riewtbit.
