Kyrshan u bah C Khongsdam na ka Mawlyndun ia ka MBDA halor ki jingkieng Diengjri

Shillong Nailur  8: Hadien ba ka Living Bridges Foundation ka la pynpaw ia ka jingpyrshah ia ka lynti ba ka sorkar jylla lyngba ka Meghalaya Basin Development Authority (MBDA) ba ka khlem iasyllok lang ia ki trai jaka ki trai bri bad ki nongsumar ia ki jingkieng dien jri shwa ba kan iakhun ban pynbna kum ka heritage site ia ki them ba don ki jingkieng jri, katba ka kynhun kiba kam kum ki trai bri trai jaka kila wan shakhmat ban kyrshan ia ka MBDA.

U rangbah shnong ka Mawlyndun u bah C Khongsdam, kumjuh ka Shiliangjashar u bah Esting Khongmawloh nalor kiwei, ki la pynpaw ba ki kyrshan ia ka MBDA kaba la wan ban iasyllok ia ki bad ki trai jaka bad kila pynpaw ruh ki pdiang ia ka jingwan batai u Sanjiv Shankar uba la thung da ka MBDA ban long uwei na ki stad ne consultant halor ki jingkieng dieng jri.

Ka MBDA ka la wan ban pynshai ban ia syllok bad ki trai jaka ba don ki jingkieng dieng jri bad ngi pdiang ia ka jingwan bad ka jingpynshai jongki, kaba la wan da u consultant u Sanjiv Shankar”, la ong kine ki riew rangbah.

Ki la pyrshah jur ia ka Living Bridges Foundation kaba la iaid lynti katto katne snem mynta ban pynphriang ia ka jingkordor ki jingkieng ba ialam da u bah Morningstar Khongthaw nalor ki trai jaka, ki trai bri, da kaba kam ba kim ithuh satia ia kane ka kynhun hynrei ki iadei kam beit bad ka MBDA.

Ki la kam ba ka MBDA ka la wan ban pynshai sha ki shnong jongki bad batai ia ki jingdonkam ha kaba la pdiang da ki paidbah namar ba kan long ka jingmyntoi ia kiba bun.

Lah ban kdew ba dang shen u bah Morningstar lem bad kiwei ki trai jaka bad trai bri, kila pynpaw ba kim pyrshah ia ka jingthmu ban pyllong heritage site ia ki jaka ba don ki diengjri hynrei kim pdiang pat ia ka lynti iaid ba ka MBDA ka la leh da kaba leh lyndet ia kiba bun ki shnong, ki trai jaka ki trai bri kiba don ki jingkieng jri.

Ki la ai jingthoh ruh sha ka sorkar ba ka dei ban pynbeit ia kane ka jingleh bakla jongka na ka bynta ka jingbit jingbiang jong ki paidbah khamtam kito kiba don ki jingkieng jri. Kiba bun kiba la ju sumar ia ki jingkieng jri, kila pynpaw ruh ba ka rukom batai uta u stad ba la thung ka MBDA, u Sanjiv Shankar kim iahap satia katkum ka jingstad kaba kila leh bad ioh ha ka jingsumar bad ka jingthung ia ki dieng jri na ki kpa tymmen jongki.

 

What Next?

Recent Articles

Leave a Reply

Submit Comment

*