Shillong, Naitung 09: Ki samla kiba la wan pass kyrpang ha ka kamrep kam riang kiba la phah da ka sorkar jylla ban leit pule mynta ka sngi kila pynlong ia ka jingiakhih ka jong ki da kaba shong kyllain mungor ha State Central Liberary, Shillong. Ka jingiakhih jong kine ki samla ka long ba mynta la shiphew snem wat la kila dep ban pyndep ia ka jingpule ka jong ki kumba la phah da ka sorkar ruh ka sorkar kam pat thung kam ia ki.
Namar ka jingbym thung kam jong ka sorkar ki samla pule kiba la wan pass kyrpang ia ka kamrep kumba la phah da ka sorkar kila thaw ia ka kynhun ia kaba ki la ai kyrteng ka Meghalaya Agricultural Students and Graduates Association (MASGA). U Bah Baiarbor Nongbri president jong ka seng u la ong ba ki samla pule kiba la wan pass naduh u snem 2008 haduh mynta ka sorkar kam pat thung kam wat tang u weir uh.
La iathuh ba baroh ki samla kiba la wan pass ia kane ka jingpule kyrpangha ka kamrep kiba khlem pat ioh kam ka long 180 ngut ha ka jylla baroh kawei. Kine ki samla baroh kiba laleit pule kila dep ban ia soi ia ka soskular bad ka sorkar ba lada kila dep ia ka jingpule jong ki, san snem ki dei ban trei bad ka sorkar lem kumta kin nym lah ban leit trei shawei.
Kum ki samla kiba la wan ban pyndep ia ka jingpule kila ia kren bad ka sorkar kaba la leit noh naduh u snem 2014, kynthup ia u myntri rangbah ka jylla bad kum juh ia u myntri ba dei peit ia ki kam rep ha ka jylla hynrei kim shym leh ei. Mynta ruh kila leit ban ia kynduh ia kane ka sorkar bad ki sngewthuh ba kane ka sorkar kaba mynta ka sngewthuh ia ka jingdawa jong ki.
Mynta ka sngi kila ia kynduh ia u myntri kam rep u Bah Banteidor Lyngdoh bad u la kyrpad ia ki ba kin ia shah shitom namar ka sorkar kamd ang peit bniah ia kane ka jingdawa jong ki. U Bah Baiarbor u la ong ba ka jingdawa ka jong ki ka long shai ba ka sorkar ka dei ban thung shuwa ia kito kiba la pass ha shuwa bad sa bud ia kiba pass ha dien.
La iathuh ba ha u snem 2015 kila pan RTI na ka tnad rep bad la iathuh ha ka RTI ba ki kam kiba lait kila don haduh 57 tylli bad haduh mynta kim tip shuh kan jinda la kiew namar kiba shong thiat ki long man u snem, la ong lada ka long ha kane ka rukom kumno ka tnad rep ka trei kam haba ymdon ophisar haduh 57 ngut ha ka ophis.
