Shillong, Risaw 10: Ha ka jingialang hapoh ka jingpyniaid u Director NEIGRIHMS, ka khliehduh jong ka tnad Pathology, ka Prof. Vandana Raphael ka la iathuh ba, na ki hospital sorkar ha ka Thain Shatei Lam Mihngi, dei tang ka ka NEIGRIHMS kaba don ia ka ‘Renal Biopsies’ kaba don bad ka Immonoflourescene. Ka tnad ka la pynmih ia ka jaka ban leh ia ka ‘Transmission electron microscopy’ ban kyrshan shuh shuh ia ka jingstad ban lap ia ki jingpang lada don jingthut ha u khyllai.
Nalor kata, ka tnad ka ai jingshakri ruh ha ka jingstad ban lap ia ki jingpang kaba kham bniah kum ka ‘Fluorescent in-situ Hybridization na ka bynta ka Leukemia bad Breast Cancer, Flow cytometry for Immunophenotying of Leukemias khlem da shim pisa ne ha ka dor bad duna tam. Ia ka ‘Immunohistochemistry’ kaba leh da kaba pyndonkam palat ia 60 antibodies la pyndonkam man ka por ban lap bniah ia ki jait jingmih bathymmai bad ba khyllah ha kano kano ka bynta jong ka met u briew.
Ka tnad Pathology ka don ruh ia ki tnad rit kaba kynthup ia Histopathology, Cytopathology, Hermatopathology bad Clinical Pathology da kaba ai jingshakri kaba 24 kynta ha ka shi sngi ryngkat bad ki tnad kyrpang kum ka Renal Pathology, Neuropathology, Gastro Intestinal pathology, Immunopathology, Oncopathology bad Dermatopathology. Shuh shuh ka la pyntip ba ka tnad ka la pynmih ia ka R & D Lab kaba mynta hi ka ai jingshakri ia ki jingwad ba kham bniah ia baroh ki briew jong ka imlang sahlang.
Ka MD Pathology kaba la sdang ha u snem 2009 ka la ioh jingithuh na ka MCI ha u snem 2012 bad 15 ngut ki khynnah pule post-graduate ki lah pyndep ia ki kyrdan jingpule (Degree) na ka tnad bad ki la long ruh ki Faculty ha ka Pathology, ki Consultant Pathologist ha ki Hospital ba bna nam bad don ruh kiba pule ia ki jingpule kiba kham shajrong kum ka DM ha ka Clinical Hematology, ki Fellowship ha ka Molecular Hematology bad kumta ter ter ha ki jaka pule kiba la bna nam.
U Director Prof. (Dr.) D. M. Thappa, u la ai jingiaroh ia ka rukom treikam jong ka tnat hapoh ka jingpeit jong ka Dr. Raphael. U la iathuh ba ki nongpyniaid (administration) ki la jied ban buh (adopted) ia ka dor kaba duna tam da kaba buh ha khmat ia ka jingkot bor (affordability) jong ki briew jong ka Thain Shatei Lam Mihngi. U la aijingmut ia ki Nonghikai Rangbah (Faculty) jong ka tnat ban ai ia ki jingtohkit (investigations) kiba lait na ka kynrum kynram hadien habud wat hapdeng ka jingkiew jong ka jingbunkam ba man ka sngi ha kane ka tnat.
