Shillong, Naitung 03: Ka tnad PWD jong ka sorkar jylla kala dep ban khot tender ban shna noh ia ka surok Mawlai by-pass ha dien ba kala weng noh ia u kontraktor u ba mynshuwa na ka daw jong ka jingsuki palat ka jingtrei.
Katkum ki lad khubor kiba la lah ban ioh la sngewthuh ba ha kane ka jingkhot tender u ba thep kyrteng ban trei ia kane ka kam don tang u wei u kontraktor bad kane kala buh ia ka PWD ha ka jingeh la kan khot biang ia ka tender ne kan ai noh ia kane ka kam sha u ne u kontraktor ba la dep ban thep.
Lah ban pynkynmaw ba u MLA jong ka Mawlai, u Bah Process T Sawkmie u la wanrah ia kane ka phang jongiakren halor kane ka surok Mawlai by-pass hapoh ka iing dorbar ha ka dorbar mang tyngka kaba la dep namar ka jingkwah ka jong u ka long ba ka sorkar ka dei ban pynstep ia kane ka jingtrei.
Ha dien jong ka dorbar mang tyngka u myntri rangbah ka jylla u Cornad K Sangma, u PWD Minister u Bah Prestone Tynsong, u MLA ka Mawlai, u MLA ka Umroi kila ia leit lang ban jurip ia kane ka surok Mawlai by-pass. Ha dien kane ka jingwan jurip na ka liang jong ka PWD kala weng noh ia u kontraktor ba rim.
Ha dien ba ka PWD kala weng ia u kontraktor ba rim ka la khot tender biang ia kane ka surok khang ban dup lah pyndep kloi, hynrei u la ba thep ia kane ka tender la ong ba u don tang u wei u kontraktor, ka jingbym don kiwei ban thep la sngewthuh ba ka PWD kala khot tender biang ia kane ka kam da ka juh ka dor kaba rim.
