Shillong, Jymmang 03: Ka North North Eastern Hills University (NEHU) kala ai ka “Affiliation” sha ka Khatsawphra C
ollege Mairang, West Khasi Hills District. Ia kane ka jingai jingithuh ba pura da katei ka skul bah ia ka college ka long ha u bnai Lber 2018, mynta u snem, ha dien ba la ioh ia ka jingbit ha u snem 2017.
Da ka jingioh ia kane ka jingithuh ba pura ia kaba la tip kum ka “Affiliation” ki samla pule ha ka kyrdan Degree mynta kin sa ioh ban thoh ia ka eksamin ka jong ki hapoh ka College. Ha u snem 2017 ka skul bah NEHU kala ai ia ka jingbit sha ki bor pyniaid jong ka Khatsawphra ba kin plie ia ka College bad mynta kane ka college kala ioh ia jingithuh bapura na ka NEHU.
Ha dien bala ioh ia kane ka jingithuh ba pura na ka skul bah NEHU, ban pynbit pynbiang na ka bynta ka jingdon kam jong ki samla pule hapoh kane ka College ki bor pyniaid kila plie ia ka jaka ai jingiarap ia ki samla pule ia kaba la tip kum ka “Students Service Centre” hapoh kane ka college, ia kaba la plied a u president u Bah Lawanpynshngiang War.
Ha kane ka sngi ba plie ia ka jaka ai jingiarap ia ki samla kiba pule ha kane ka college la sam ruh iaki Tablet (mTAB) sha ki khynnah kiba dang ap ia ka result HSSLC jong kane ka college kiba ka sorkar jylla kala ai ba na ka bynta ki khynnah ba pule ha ka Class XII jong u snem 2017-18, ia kaba la pynioh ia kine ki mTAB sha ki samla pule lyngba u Deputy Commissioner jong ka West Khasi Hills u Arun Kumar Kembhavi.
Ka jingthmu jong ka college ban plie ia kane ka jaka ai jingiarap ia ki smala pule ka long kum ka jingbatai lem ia ki samla pule kiba leit ban shim ia ki phom ban rung klass ha kane ka college ba kumno ban leh khnang ba ka jingpule ka jong ki kan long kaba jop.
Ha kane ka sngi la don lang ki dkhot kiba pyniaid ia kane ka college, u Principal jong ka college u Bah Boldness L Nongum, ki nonghikai bad ki nongtreiha kane ka college. Iaka jingkren ai khublei bad jingpynshai ha kaba ia dei bad kane ka “Students Service Centre” la batai da ka Vice Principal ka kong Aida C War.
