Shillong, Jymmang 01: U Symbut Myntri Rangbah ka jylla u Bah Prestone Tynsong u la ong ba lah ban ong ba ka jylla Meghalaya kala lait na ka khlam COVID-19, namar ba baroh 11 ngut kiba la ioh ia kane ka jingpang mytna kila long Negative.
Haba kren ha ki lad pathai khubor mynta ka sngi u Bah Prestone u la ong ba shiphew ngut kiba la dep ban test ar sien ki la long Negative bad ka test kaba nyngkong ia iwei ruh ka long Negative mynta kin dang leh ia ka test kaba ar sien bad kyrmen ba kan long Negative ha ka sien kaba ar ruh.
Dei halor kane ba la lah ban ong ba ka jylla Meghalaya kala lait na ka khlam COVID-19. Na ka liang ka sorkar kala bthah ia ki 10 ngut kiba la dep ban test ar sien ba kin dang betang ia ka jingshong ha iing sa 14 sngi.U Symbyt myntri rangbah u la iathuh haduh mynta la dep ban test haduh 1629 ngut, na kine 1557 ngut ki long Negative bad ka resolt kaba dang ap ki long 60 tylli.
