La poi shikompeni  ki pulit CrPF ban pahara ha ka ilekshon shiteng samoi ha Shella: CEO

Shillong, Risaw 11: U bah Fredric Roy Kharkongor Chief Electoral Officer (CEO) jong ka jylla Meghalaya u la iathuh ba shikompeni ki pulit CrPF kila poi ha Sohra na ka bynta ban pyndon kam ban pahara ha ka sngi thep vote ha kane ka ilekshon shiteng samoi ha 26-Shella Konstitwensi.

Haba kren ha ki lad pathai khubor mynta ka sngi u la ong ba nalor ki pulit CrPF, ki don ruh ki pulit na ka jylla bad kum juh ki kynhun pulit ba la tip kum ki “Flying Squad” kiba la don ha ki bynta bapher bapher jong ka konstitwensi.

La iathuh ruh ba la ai jinghikai ia ki 300 ngut ki ophisar na ka bynta ban pyniaid ia ka jingiathep vote ka ban long ha ka 21 tarik mynta u bnai bad ka sngi niew vote ha ka 24 tarik mynta u bnai. La ithuh ba ki kor thep vote kila poi bad mynta la peit bniah ia ki ban peit ba kin nym don kano kano ka jingthud.

La iathuh ba baroh ki jaka thep vote ki don 48 tylli bad na kine ki don 11 tylli ki jaka thep vote kiba la niew ba ki lah ban don ha ka jingma namar ki don ha khappud bad ka Bangladesh ha kaba ka dong jingiakhleh lang ki paidbah nongshong shnong.

La iathuh ruh ba ki don 6 tylli ki jaka kiba hap iaid kjat, ki ophisar ba dei pyniaid ia ka ilekshon ki hap ban mih ar sngi shuwa ka sngi thep vote bad ia kane la ioh ia ka jingbit na ka Election Commission jong ka Ri India.

Laiathuh ba haduh mynta ki briew kiba don ia ki suloi ba la ioh laisen na ka sorkar kiba la leit ban buh ha police station ki don 21 ngut, la iathuh ba ha kane ka ilekshon shiteng samoi ki pulit kila ioh kurup ia ka kyiad kaba la jan kot sha ka T.30000/- tyngka.

 

What Next?

Recent Articles

Leave a Reply

Submit Comment

*