Mairang, Kyllalyngkot 17: Ka ophis jong u Deputy Commissioner (Supply) ka Eastern West Khasi Hills District ka pynbna paidbah sha baroh ki longiing kiba don hapoh ka distrik ba la pyllait lyngba ki dukan rashon ia u khaw rashon katkum ka National Food Security Act, 2013 ka bynta u bnai Kyllalyngkot 2023.
Na ka bynta u khaw khaw PHH, yn sam 5 kilo shikhlieh briew khlem da donkam ban siew pisa, na ka bynta u khaw AAY, yn sam 35 kilo shi card bad ia une ruh ym donkam ban siew pisa; katba, ia u khaw Non- NFSA pat yn sam 7.215 kilo shi card ha ka dor 13 tyngka shi kilo.
Ym bit ban ai duna ne ot na ka bhah ba la buh ne mang da ka sorkar ha kaba iadei bad ka jingsam ia uno uno u marbam ba la ai na ka NFSA bad Non- NFSA bad la bthah ruh ia baroh ki FPS dealer ba kim dei ban pynduh khaw ia kito ki nongbam ki bym pat don ia u Aadhaar Card bad ia kito ki ba la pynjah ia ki card rashon ki jongki.
Ia ka bai kit bad bai kali ban pynpoi ia kine ki marbam hapoh jong kitei ki skhim yn bei pisa da ka sorkar sha ki Wholesaler ne Dealer kumba ju leh na ka por sha ka por.
Lada lap ia kino kino kiba pynkhein ia kitei ki kyndon yn pynshitom katkum ka ain bad lada don kano kano ka jingujor halor ka jing bym thikna ka jingsam ia ki mar rashon, ki nongioh bhah ki lah ban phah da ka jingthoh sha u District Grievance Redressal Officer.
Ki lah ban phah ruh sha u Additional Deputy Commissioner (Supply), Eastern West Khasi Hills District, Mairang lane ki lah ban thep ha ka Complaint Box ba la buh da ka office u Deputy Commissioner (Supply), bynrap shuhshuh ka kyrwoh jong u Deputy Commissioner (Supply) ka Eastern West Khasi Hills District .
