Shillong, Jymmang 06: Ka Khasi Student Union (KSU) mynta ka sngi kala pyndep iaka ilekshon naka bynta ki dkhot jong ka Central Executive Committee (CEC) jong u snem 2023-2026.
Ha kane ka ilekshon, la jied biang ia u samla Lambokstarwell Marngar ban ialam biang iaka KSU naka bynta u snem 2023-2026 hadien ba khlem don ba ieng ban iakhun iaka kam President.
Ha kane ka ilekshon na ka bynta ki dkhot CEC jong u snem 2023-206 nalor ka kam president, la shem ba khlem don ba ieng ban iakhun iaka kam vice president bad General Secretary bad la bat biang hi da u samla Biangbor Paliar bad u samla Donald V Thabah kum.
Kiwei ki dkhot ka CEC kiba la shah jied thymmai ki kynthup iaka kam Assistant General Secretary la bat da u samla Ruben Najir, Organising Secretary da u samla Raymond Kharjana, Education Secretary Pynkmenlang Sanmiet.
Information and Publicity Secretary Pynshaiborlang Rani, Office Secretary Spaindonsing Lyngkhoi, Sports and Cultural Secretary Eric A Nongkynrih bad ia ka kam Environment Secretary la bat da u samla Shiningstar Kharbuhkhiew.
Haba kren hadien ka ilekshon CEC 2023-2026, u President ka KSU u samla Lambokstar Marngar ula ai khublei ia baroh ki dkhot kiba la wanshim bynta ha kane ka ilekshon na ka bynta ban pynthikna ba ka jingjied iaki dkhot ba thymmai ka long kaba seisoh.
U samla Lambokstarwell ula iathuh ba shen ka CEC kan sa lum ka jingialang na ka bynta ban pynrung dkhot biang sa ia kiwei ki samla sha ka seng bad haka juh ka por ban pyrkhat iaki sienjam ba ka seng kan shim nangne shakhmat.
Nalor kane u president ka KSU ula pynrem jur halor ka jingsiat iap ki shipai Border Security Force (BSF) ia u bah Roning Nongkynrih ha Mawshun bad ula ong ruh ba ka KSU ka dawa naka sorkar ban pynshitom tyngeh iaki ba donkti ha kane ka kam pyniap briew.
Naka liang u vice president barim ka KSU u bah Danny Khyriem ula iathuh ba kila don 33 kyrteng ki ba iakhun ha kane ka ilekshon bad na kine 3 ngut kila jop suk namar khlem don ba ieng ban iakhun pyrshah.
