La pynhap pyrda ia ka jingialehkai kaba ar sngi jong ka thain Tyrsad, ia don lang u MDC

Shillong, April 26: Ka Tyrsad Area Sports Association ka la pynlong ia ka lympung iakob ialehkai kaba lai ia ki skul kiba don ha ka thain ha kaba ar sngi lynter la pynkut mynta ka sngi.Ha ka sngi kut jong katei ka lympung ialehkai u MDC ka thain u Bah Lamphrang Blah u la long u kongsan bad u Bah D. Dan District Sport Officer ka East Khasi Hills District kum u Symbud Kongsan .

Haba kren ha ka jingialang u Kongsan u la ai khublei ia ka  seng kaba la shimkhia ban kyntiew ia ki kam ialehkai ha ka thain na bynta ka jingmyntoi ki samla pule.  U Symbud Kongsan ruh u la pynpaw ka jingkmen ia kane ka jingshimkhia ka seng na ka por sha ka por bad kyntu ia ki samla pule kiba long ka lawei ka jaidbynriew bad jylla ban niewkor ia ki kam ialehkai bad ki jingpule.      U Bah Kennedy Khyriem MLA barim uba la don bynta ban noh synniang ia katei ka lympung u la kyntu ia ki samla pule ban pyndonkam janai ia ka por ha ki jingpule khnang ba kin lah ban kiew shaphrang.

U Bah Staising Kharbteng uwei na ki trai shnong ka thain u la pynpaw ba donkam ban weng sharud ia ka mynsiem iatan tyllai bad woh kjat ha ka imlang sahlang khnang ba ka thain kan kiew shaphrang ha baroh ki liang khamtam ha ki kam ialehkai .

U Bah Phelenstar Rani President ka seng u la ai khublei ia baroh ki skul kiba la wan ban iashim bynta ha ka lympung ialehkai, u khot u wer ia ka jingkyrshan ki paidbah nongshong shnong ia ka seng khnang ba yn nanglah ban wanrah shibun ki prokram ban ai jingmyntoi ia ki khun samla bad riew ieit ia ki kam ialehkai bad kiwei kiwei ki nongkren.

Ka Lyngiong Presbyterian Secondary School ka la jop ha ka March Pass da ki khynnah kynthei bad ka Silver Spring Adventist  Secondary School,Lyngiong ka la long ka lahduh napdeng baroh ki skul kiba la wan ban iashim bynta.

What Next?

Recent Articles

Leave a Reply

Submit Comment

*