Shillong, Lber 24: Ar ngut ki myllung na ka Jylla Meghalaya, ka Prof. Streamlet Dkhar, ka Myllung Khasi ba pawkhmat bad ka Falguni Chakraborti ka myllung Bengali ki la ïoh ban leit mih khmat sha ka jingïakynduh jong ki nongthoh bad ki myllung ba pawkhmat ha ka “South Asian Literature and Culture Summit-2018” kaba la long lai sngi lynter naduh ka 13 tarik haduh ka 15 tarik mynta u bnai ha Pirganj, Rongpur, Bangladesh ba la pynlong da ka Association For South Asian Literature and Culture (AFSACA).
Kane ka seng ka la pynkynmaw ïa ka jingïakhih jong ki nongshongshnong ka Ri Bangladesh na ka bynta ka ktien Bangla kaba la sdang ha ka 21st February jong ka snem 1952. Bun bah ki samla pule bad ki riewieit ri ki la ïa shim bynta ha kata ka jingïa eh bad kiba la duh la ka jingim ha kata ka jingïakhih ban ïoh ïa la ka ktien; u Kpa ka Ri Bangladesh, U Bangabandhu Sheikh Muzibur Rahman u la pynbna ïa ka jinglaitluid ha u bnai March, 1971.
Da ka mynsiem kaba kmen bad ba burom ïa ki myllung, ka la don ka jingïasam ïa ki kolshor ba pher bad ka jingïa pule poitri na ki myllung kiba na ki jait ktien bapher bapher kum ban rakhe ha une u bnai jong ka jingïoh ïa ka ktien Bangla. Ka Prof Streamlet Dkhar ha shuwa ba kan pule ïa ki poitri jong ka ka la ai jingkren khyndiat halor ka jingsdang jong ka ktien thoh ha ka Khasi ha ka ba ka la ong ba ngim dei ban klet ba ïa ka ktien thoh ha ka Khasi la sdang nyngkong ha ki dak Bangla bad pyndonkam da ka ktien tnat jong ki Shela da u William Carey bad u Krishna Chandra Pal ha ka snem 1813 na ka Serampore Baptist Mission.
U Rev Alexander Burg Lish jong ka Serampore Baptist Mission u la wanrah ïa ki lai tylli ki skul ha Mawsmai, Mawmluh bad Sohra ha ka snem 1932, hynrei la khang khyrdep noh ha ka snem 1838. Ka la batai ruh ba la don bun ki myllung Khasi kiba la pynkylla Khasi ïa ka Gitanjali jong u Rabindranath Tagore. Ka Prof. Streamlet Dkhar ka la ïoh ïa ka khusnam kum ka Myllung, ka Nongthoh Drama bad Novel bapaw khmat jong ka Jylla Meghalaya ha ka 14 Tarik u Lber 2018 ba la pynkup burom da u Sultan Ahmed Sona, u Editor bad Publisher ka Bwazra Katha bad u Secretary AFSACAL, Bangladesh ha ryngkat ki myllung na kylleng ka South East Asia.
Hadien jong ka jingïakynduh jong ki myllung, ki nongrwai ba paw bad u nongïaleh laitluid, u Muzafar Hussain Bakul, Ka seng Anyodhatra Sahitya Sansad ha ryngkat ka Alokkito Protidin Anyodhara ki la khot sngewbha pat kine ki arngut ki myllung na Meghalaya ban don lang ha ka jingrakhe ïa ka sngikha jong u myllung bakhraw ka Bangladesh u Sharkar Mahbub ha ka 16/3/18 ha Engineering Institute, Dhaka kaba la ai sa kawei pat ka khusnam ïa ka Prof. Streamlet Dkhar “Ka Honorium Crest” na ka bynta u synñiang ba snah sha ka thoh ka tar. La ai ïa katei ka khusnam da ka Kazi Rozi, ka Dkhot jong ka Parliament ha Bangladesh, ha ryngkat kiwei de ki kynrem ki lyndan bad ki myllung ba khraw ka Bangladesh.
