Shillong, Lber 12: U Bah Banshai Marbaniang u la ong ba “Da ka jingsngew ktang kaba khraw eh na kaliang jongnga kum uwei na ki nongshong shnong ka thaiñ Mawsynram Block bad kumjuh ruh kum u nongtrei Sengbhalang hapoh katei ka thaiñ nga la hiar ban leit khmih bad jurip da la ki jong ki khmat iaka jingeh kaba ki paidbah ka thaiñ ki iakynduh, khamtam eh ha kaba iadei bad ki nongleit nongwan ba man la ka sngi lyngba ka Surok Mawphlang-Balat Road”.
Ka jingjot jingpra jong kane ka surok ka lah nang ktah jur shuh shuh khamtam eh naduh ka thaiñ Phlangwanbroi ter ter shaduh sharum kynthup ia ka Tlongpleng, pyndensohsaw haduh ban da poi hapoh Balat. Ka jingsniew jong kane ka surok kala wanrah ia shibun ki jingeh ha kiba bun ki liang. Ka jingsniew jong kane ka surok ka lalong shaba palat pud, kat haduh ban mih ka jingeh kiba khraw khamtam eh ia ki Nongpang kiba wan kit da ki kali lyngba katei ka surok ban poi sha Shillong naka bynta ban ioh jing sumar.Kumjuh kane ka jingjot jong ka surok ka paw ruh haba phai sha ka surok Mawsynram-Ryngku Border Road kaba lok thik kumba khlem don ba peit ba jngoh da ki phew snem kiba la leit noh.
Kum u President jong ka Seng FKJGP Mawsynram Circle, u la ju iai ban pynkynmaw ia kane ka juh ka bynta sha ki bor ba halor jong ka sorkar ban sngap lem ban phai ki khmat sha katei ka thain kaba dang don shibun ki jingduna khamtam ha kaliang ka surok. La iohi ha kine ki sngi ba kala don ka jingpyrshang ban maramot ia ki thliew ki syar sha ki thaiñ Lyngiong ter ter haduh Mawsynram bad kane ka la ai ia ka jingmyntoi kaba tang shiphang por hynrei nga ngeit skhem ba kan ymlah pat ban neh bad ai ia ka jingshakri da kaba bun snem kumba la iohi iaka jingtrei kaba tang ban pyndap rong tang iaki thliew ba pei suda khlem da khlong naduh ka tynrai kaba la sniew pura.
Dang ha u snem 2012 kane ka surok MB Road ka la ioh pdiang pisa napoh ka tnad NLCPR kumba Rs. 12.00 Klur tyngka bad shen dang ha u snem ba la lah la ioh biang ban pdiang pisa lyngba ka SPA Scheme haduh Rs. 15.00 Klur tyngka ban maramot bad pynbha ia kane ka surok. Kaei pat kaba sngewsih haba phai sha kane ka surok la iohi tang ki dien pei suda kat haduh teng teng wat ban iaid da ki kali hajan riat ruh ym I nud shuh ka pyntieng punsmiej wat ia kiba shong bapli.
Haba la pyrshang ban khmih bad bishar lyngba ka RTI kaba nga la ioh pdiang napoh ka Planning Department jong ka Sorkar Jylla lyngba ka State Plan Outlay naduh u snem mang tyngka 2007-2008 haduh 2015-2016 kaba kdew ia ka jingioh pdiang pisa lyngba ka Budgeted Outlay ba la bei da ka Sorkar kmie bad haba phai sha ka jingioh pdiang pisa ha baroh kitei ki snem ka la kot haduh Rs. 3,00,032.00 Klur tyngka tang ha ka tnad Transport. Ka jingpynlut lyngba ki surok bad jingkieng (Road & Bridges) ka la poi sha ka Rs. 2,67,013.00 Klur tyngka, nangta ka bynta jong ka Road Transport ka long Rs. 3,135.00 Klur tyngka bad haba khein kyllum ia kitei baroh ki jing pynlut ka la kot sha ka Rs. 2,70,148.00 Klur tyngka.
Kumta ka pisa kaba dang tam bym pat lah ban pyn treikam lut baroh ka dang sah kumba Rs. 29,884.00 Klur tyngka. Ka jing kylli kaba mih mynta ka long “hato ka Sorkar lyngba ka Tnad Transport kan leh kumno ia katei ka pisa kaba dang sah la kan pynphai noh ne la kan dang pyrkhat ban leh da kumwei pat?.Ym tang katta, ka la don ruh ka jingioh pdiang pisakyrpang ha kaba iadei bad ki surok lyngba ka tnad Special Area Programme jong ka BAD Road under PWD bad ka jingpynlut lyngba kane ruh ka la kot sha ka Rs. 1950.79 Klur tyngka.
Lada peit ia ka jingioh pdiang pisa jong ka Sorkar Jylla kumba ka paw lyngba ka State Plan Outlay bad Expenditures ka dang kiew dang kiew kat dang mih ki snem. Pynban kaba sngewsih kalong kat shaba phai khamtam sha ki thaiñ nongkyndong kam shym la don kano kano ka jingpyrkhat ban pynbha ia ki surok. Shano kane ka pisa la pyntreikam bad ha kano ka bynta ruh la pynlut iaka. Kum ki paidbha ngi donkam ban ioh iaka jingshai kaba pura ym ban shu sah ha ka umdum.
Haba phai sha ka surok Mawphlang-Balat Road la donkam ban kyntiew kyrdan ia kane ka surok namar kumba ka paw kane ka surok kumba ia tip lang baroh ka pyniasoh iaka Ri India bad Bangladesh ha kiba bun ki liang bad napdeng kita kadei ka khaii ka pateng bad ka kam jngohkai pyrthei.
Ha ba phai sha ki kam jngoh kai pyrthei kiba bun ki tourists ynda kila leit phai ki dap da ka jingsngewsih haba iohi iaka jinglong ki lyngti ki syngkien khamtam ki surok namar ba kilong kiba sniew haduh katta katta. Kane kan khate ia ka lad ioh kam ioh jam jong ki nongshong shnong jong kitei ki thaiñ ha kiba bun ki liang ha kaba iadei bad ka kam jngohkai pyrthei.
U Bah Banshai u la ong ba ka dei ka kamram khamtam ia ki nongmih khmat jong ki MLA bad MDC kiba ju iaid lyngba kane ka surok bad nga da kyntu jur ruh naduh ki Nongmihkhmat jong ka Mawphlang Constituency, Mawkyrwat Constituency, Mawsynram Constituency, Langrin Constituency bad khamtam eh U MLA jong ka Ranikor Constituemncy U Martin M.Dango uba bat ruh iaka kyrdan PWD Minister jong ka Sorkar Jylla ban peit bha ha kaba iadei bad ki surok bad ruh kan long ka bynta kaba kongsan eh lada ynjin da dei ba phai lem ki khmat sha kine ki thaiñ bad thep ki scheme kiba biang katkum ka jingiaid jong ka por khnang ba kan wanrah jingsuk ia ki paidbah salonsar. u da kyntu jur ruh ba ha kum kane ka por ba don ka Budget Session jong ka Sorkar hapoh Assembly ban pynpaw i aka jingeh ha kaba iadei bad kane ka surok khamtam na ki 5 ngut ki nongmihkhmat kiba hap iaid lyngba kane ka surok.
La ong ba un leit ban iakynduh markhmat ia u Minister jong ka tnad PWD u Martin M. Danggo bad kiwei kiwei ki heh sorkar kiba don hapoh kane ka tnad ban ai da ka dorkhas (Memorandum) halor ka jingsniew ba palat liam jong kane ka surok bad ruh lada long kaba lah ba u rah ia kane ka bynta ban pynsngew ha khmat jong ki paidbah ka thaiñ la aiu kidon ban ong halor kane ka mat namar ba kadei ka bynta jong u paidbah ban tuklar lem naka bynta ban ioh iaka ba angnud, la ong u bah Banshai Marbaniang na Mawsynram.
