Shillong, Iaiong 20: U bah Lambor Malngiang MLA jong ka Nongkrem mynta ka sngi u la plie ka jingai jingsumar ei ha shong Pomlakrai ia kaba la pynlong da ka ophis jong ka Mylliem Block ban rakhe ia ka jingdap saw snem jong ka “Ayushman Bharat – Health & Wellness Centers” ha Meghalaya.
Ha ka jingkren u bah Lambor MLA jong kane ka jaka u la kyntu ia ki paidbah ba kin wan sha khmat ban shim ia ki lat jingsumar kaba ka sorkar kala pynbiang na ka bynta jong ki paidbah, ha kane ka sngi u la ai ka jingkhublei kaba kyrpang ia ka tnad ka ophis jong ka Block kaba la pynlong ia kane ka jingai sumar ei.
U bah Lambor ha kane ka sngi u la pyntip ba shen ynsa plie noh ia ka “Agrilla Health Centre” ha ka juh ka por u la pynpaw ia ka jingsngewsih ba katei ka jaka ka dang don shibun ki jingduna ha ki lat jingsumar ha katei ka thain, ha kane ka sngi la ai khublei kyrpang ia ki ASHA kiba la trei shitom ha kane ka jingialeh pyrshah ia ka khlam COVID-19.
Ha ka jingkren jong u MDC u bah RV Lyngdoh la ban jur ban pynsngewsthuh ia ki paidbah ba kin shim ia ki lat jingiada, ha kane ka sngi u la pynpaw ia ka jingsngewkhia ba ka jingpang bampong ha kane ka jylla kala jyllei sha ba palat, u la kyntu ia ki paidbah ba kin sngap ia ka jingbatai ki nongtrei ka tnad ka koit ka khiah ym ban sngap ia kiba ong hana.
Ha kane ka jingai sumar ei la pynshai paidbah ruh ha kaba ia dei bad ka jingshitom ba dei ka bor jabieng, Ka jingkhlad ki long kmie por ha khyllung, ban iada na ka jingpang bampong bad ban iada na ka jignduna snam, ka jingdon wih bad ka jingarmet ba dang khynnah la pynshai paidbah ha kane ka sngi, ia kane la pynlong ha shnong Pomlakrai bad ia kane la pynlong lyngba ka National Health Mission, Meghalaya.
