Shillong, Naitung 18: Ka jingialang jong ki Muster Roll kaba la long ha ka 17 tarik Naitung 2018 hapoh ka shnong Mawsynram ka la long kaba iaid beit iaid ryntih ha kaba la ioh ban jied bad pynskhem syndon ia ki nongkitkam jong ka Mawsynram Area Unit kynthup naduh u President Bah Mod Iawrod lem bad ka Secretary Kong Jansi Kharraswai ha ryngkat bad kiwei pat ki nongkitkam kiba hakhmat jong katei ka unit ki banlong aiti bad trei na bynta ka bha ka miat jong ki para Muster Roll.
Ki Muster Roll kiba la wan mih ha kane ka sngi ki long kiba trei hapoh ki ophis sorkar bapher bapher jong ka Jylla kiba kynthup naduh PWD, PHE, Forest, Veterinary bad kiwei kiwei kiba don hapoh ka thaiñ kynthup naduh Tyrsad, Sawsymper, Mawsynram, Lawbah-Ryngku ter ter shaduh Balat.
Kane ka jingialang ka la long kaba jop da ka jingshimkhia jong ki para muster roll ban ia poi ryntih ha katei ka sngi. Ha kane ka sngi la ioh ban iadon ryngkat lang da u Bah Ricky Thabah President ha ryngkat bad u bah Teibor Marpna uba dei u General Secretary jong ka All Meghalaya Muster Roll Workers Union (AMMRWU).
Ha katei ka sngi la ioh ban ia donlang ruh da u Bah banshai Marbaniang, Social Activist jong ka thain bad kumjuh ruh da ka jingiadonlang jong u Bah K.J.W Thabah iba la wan mihkhmat napoh ka Citizen Foundation for Human Development (CFHD) kaba long ka seng kaba ju trei bad iarap na bynta ka jingeh kaba ki rit ki ria ki ju iakynduh nakapor sha kapor halor ka jingshah ban bein da ki bor kiba halor khamtam na ki bor sorkar.
Ha kane ka sngi la ioh ia ka jingkren pynshai na u Bah Banshai Marbaniang uba la pynpaw ba haba phai shaka thain kham bun na ki para nongshong shnong kiba trei ha ki kam bapher bapher naduh ki Muster Roll, Ki ASHA, ki Aganwadi lem bad ki Domestic Workers kham bunsien ki ju mad ia ki jingeh khamtam haba ki ju iohsngew ia ki jingpynbna kiba bun kiba na kaliang jong ka Sorkar Jylla wat haduh ka Sorkar Kmie ruh kumjuh ka la pynmih na bynta ka jingmyntoi jong ki rit ki ria haba ki trei, pynban ki shu jah rngai khlem da poi sha ka kti jongki wat tang khyndiat ruh wat hadien ba ki la pyndep ia ka kam.
Kane ka jingshah leh bein jong ki kalong ka jingshah iuhroit khlem da khein briew eiei wat tang khyndiat ruh hapdeng ki para briew kiba trei ia ki kam kiba rit bad khlem da don ka mynsiem ban iarap na bynta jong ki. U Bah Banshai I la pynpaw ba katba lah la I buit I bor in pyrshang ban trei bad ban wad ia ki jingshisha baroh ban sei madan khlem jingsalia halor ki jingjia kiba ju iai jia nakapor sha kapor kaba la ktah shisha ia ki nongtrei barit jong ka thain kumjuh wat ha ka jylla baroh kawei tang na kadaw ka jngmyntoi shimet jong ki heh sorkar.
Khatduh I Bah Banshai U la ong ba ha kaba iadei bad ki ASHA, Aganwadi lem bad ki Domestic Workers yn hap ban tih bniah shuh nalor ka jingshem jong ki kumba ki la pynpaw bad kumjuh ruh ha ryngkat da ka jingiatreilang jong ka State Union bad ka Unit kaba ladon hapoh ka thain.
U Bah Ricky Thabah kum u President jong ka State Union ila pynpaw ba ka jingpynkiew tulop ia ki muster roll tang shisien hapdeng ki san snem kan wanrah jingmyntoi aiu namar ba ka jingkyntiew tulop kam palat ia ka 15 haduh 20 tyngka wat hapdeng ka jingdawa kaba jur lyngba ka Union na kapor sha kapor khamtam ha ba pyrkhat na ka bynta ki jingdonkam kiba manla ka sngi katkum ka jingiaid jong kapor.
U la ong ba na ka liang jong ka Sorkar Jylla bunsien ka ju pyrshah khamtam na ki Myntri Sorkar wat haba ka la don ka rai kaba kyrpang na bynta ki Regular Casual Workers kiba la trei palat ia ka 10 snem ba lada ka lait ka post dei ban thung beit da ki khlem da donkam ban pynkylla da kumwei pat pynban haba peit tang hapdeng ki khyndiat sngi la thung da ki briew ki bym don bynta eiei ruh em ban ioh ia kata ka kam.
U la kyntu ia baroh ba dei ban long kiba iatylli na bynta ban dawa ia la ka jong ka hok kumba la mang khlem da sheptieng. Khatduh u la pynpaw ba kito ki para Muster Roll ki bym don ka mynsiem ban ai ia ka jingkyrshan ne wat ban ia snoh ktilang ryngkat bad ka jingiaid lynti jong ka Union, ka union kan ymdon jingkitkhlieh eiei ruh em na bynta jong ki.
Ka jingialang ka la kut da ka jingpynskem ia ki Nongkitkam jong ka Mawsynram Area Unit da U Bah Ricky Thabah President jong ka AMMRWU bad u la kyntu bad ai mynsiem ia ki ba kin trei shit rhem naduh kaba sdang khlem da kynran dien khnang ba baroh kiei kiei kiba thmu kin long kiba jop bad seisoh.
