Shillong, Jylliew 02: Ha kaba iadei bad ka prokram Ek Bharat Shreshtha Bharat jong ka Sorkar India, kaba thmu ban kyntiew ia ka jingiadei bad jingsngewthuh hapdeng ki briew jong ki jylla/UT bapher bapher, la rakhe ia ka sngi seng ia kijylla Telangana bad Goa ha Raj Bhavan mynta ka sngi.
Ban pyndon burom ia kane ka sngi la pynlong ia ka prokram deiriti ha kaba u Air Marshall, Eastern Air Command, S. P. Dharkar AVSM u la plie ia ka jingialang kum u kongsan ha ka jingiadonlang u Commissioner bad Secretary sha u Lat ka jylla, u Dr B D R Tiwari.
Ha ka jingai jingkren ha ka jingialang, u Air Marshall u la iaroh ia ka sienjam jong ka sorkarpdeng ban rakhe ia ki Sngi Seng jong ki jylla bapher bapher, ha kaba u la ong kan iarap bha ban wanrah ka jingiatylli bad jingiasngewthuh lang ia ka ktien, ka dustur bad ka deiriti jong kiwei.
Ha ka jingai jingkren, u Dr B D R Tiwari u la ai jingtip shaphang ka histori jong ki jylla Goa bad Telangana da kaba batai shaphang ki bor bad ki jingjop jong ki.
Ha kane ka janmiet la pyni ia ka jingriewspah ka deiriti jong ka jylla Meghalaya lyngba ka “Shad ShohKba” lane ka jingshad por lum ia ki mar rep jong ki briew na Jaintia, ki jingshadBharatnatyam na ka Geetanjali Dance Academy bad ka jingrwaijingtem na ka Sur Nongkyndong Orchestra.
