Shillong, Lber 31: Ia ka People Democratic Front (PDF) la leit ban register bad ka Election Commission jong ka Ri India ha ka 15 tarik mynta u bnai, bad kane ka seng sain pyrthei kaba thymmai kaba la mih ha kane ka jylla Meghalaya, yn sa ithuh hapoh ka election commission jong ka Ri kum ka “Register Unrecognized Political Party”.
Ka jingpynbna paidbah ba la seng ia kane ka seng sain pyrthei kaba thymmai hapoh kane ka jylla Meghalaya la pynbna da u president jong ka seng u Bah Ivanlumlang Marbaniang ha ka jingialang kaba la long ha ophis trei kam jong ka seng ha Nongrimhills, Shillong.
Katkum ki kot ki sla kiba la ai sha ka Election Commission jong ka Ri India, ki nongkit kam jong kane ka seng sain pyrthei ki long, u Bah Ivanlumlang Marbiang kum u president, Bah AL Mawphlang kum u Genenral Secretary, u Bah Emlang Lytan kum u Working president, shiphew ngut ki dkhot jong ka Executive Committee bad 116 ngut ki dkhot.
U Bah Lytan working president, u la ong ba ha kine ki sngi kin sa ioh ia ka jingthoh na ka election commission jong ka Ri India bad ha dien ba kila ioh ia ka jingthoh kin sa buh ia ka application ban pan pat ia ka shap jong ka party.
