Shillong, Iaiong 27: U Bah G K Iangrai Assistant Inspector jong ki pulit (A) jong ka jylla Meghalaya mynta ka sngi u la pyntip ba ki pulit jong ka Laitumkhrah Police Station kila register mukotduma pyrshah ia ka samla Phoebi Dale Smith Nongrum kaba 31 snem.
Ka jingregister mukotduma pyrshah ia katei ka thei samla ka long ba kala niah beain ia ka kali ML-02-0416 kaba dei ka Bolero bad ka jingniah thulmur ia katei ka kali ha ka miet 25/4/2020.
Ki pulit jong ka Laitunkhreh kila register mukotduma pyrshah ia katei ka thei samla bad ka mukotduma number ka long 70(04)2020, hapoh ka kyndon IPC bad hapoh jong ka MV Act.
Haba ia dei bad kane ka jingjia na ka liang jong u symbut myntri rangbah jong ka jylla u Bah Prestone Tynsong u la ong ba ka ain kan sa leh ia kaba don kam , ha ka juh ka por u kyntu ia baroh ban nym ia pyndon kam bakla ia ki pass kiba la ai la ki dei ki kali sorkar lane ki kali jong ki riew shimet.
