Shillong, Naitung 27: Ka jingiakhih shong kyllain mungor jong ki nonghikai skul hapoh jong ka lama JACATAM kaba lai sngi lynter kala sdang mynta ka sngi ha baroh kawei ka jylla Meghalaya ban dawa na ka sorkar b aka dei ban shimti noh ia ki nonghikai kum ki nongtrei sorkar, ia kaba la tip kum ka “provincialisation”. Khlem da shimnoh ia ka management jong ki skul.
Kine ki nonghikai ki dei kiba hikai ha ki skul, naduh ki Lower Primary, Upper Primary bad ki secondary school, kiba dei lang ia ki skul ba ioh Adhoc, Deficit school. Ka jingdawa jong kine ki nonghikai kiba don ha kane ka seng JACATAM haduh 14776 ngut ka long ba na ka bynta ka juh ka kam kaba ki trei ka dei ban don ka juh ka jingsiew.
U Bah ED Nongsiang Chairman jong ka JACATAM haba kren ha u SP News Agency u la ong ba ka jingiakhih ban shong kyllain mungor kala sdang mynta ka sngi ha baroh kawei ka jylla katkum ki jaka kaba kila dep ban pynbeit, ha kine ki ar sngi kin long ha ki Zone bad ha ka 29 tarik kan long ha ki headquater jong ki district.
La iathuh ba ka jingleit ia kynduh ka jong ki ia ki briew jong ka tand pule puthi ha ka sngi nyngkong ka long ba ki bor jongka sorkar ki kwah ban tip la ka seng kan iaid sha khmat ne em bad kane ka jingiakhih ka jong ki ha kaba kila jubab ba kin iaid sha khmat lada ka sorkar kam leh ei ei ia kane ka jingdawa ka jong ki.
Na kiwei pat ki lad khubor la sngewthuh ba la da ka sorkar ka kloi ban khot ia kren halor kane ka kam n aka liang jong ka JACATAM kan nym pyneh hynrei ki long kiba la kloi ban iakren bad ka sorkar, haduh mynta ka sngi kaba ki la sdang ia ka jingiakhih ka jong ki ka sorkar kam pat phah kano kano ka jingthoh sha ki nongialam ka JACATAM ban ia kren.(SP News)
