La sdang ka kiew pynehrngiew sha u Lum Sohpet bneng,kan lut la sngi u Blei

Shillong, Kyllalyngkot 31: Ka kiew pynksan rngiew pyneh rngiew ba shisien shisnem sha Lum Sohpetbneng ka la sdang ha ka 26 tarik Kyllalyngkot, da ka nguh ka dem ka duwai ka phirat ka kñia ka khriam ha law Nongthroh ha syntai u Lum sohpetbneng. Kane ka jinglehniam lah dep pynlong shwa ka kiew lum paidbah sha kliar u lum sohpetbnemg ha ka 2 tarik u Rymphang.

Ha ka lehniam lehrukom da lah dep la pyniaid da u riewtymmen riewsan Rangbah Skor Jala, u Khnong Rynsan jong ki tymmen ki san ka seng Khasi Mawkhar Shillong. Hangne la kyrpad kyrpon ba ia ka kiew lum pynehrngiew ha ka 2 tarik u Rymphang kan ym don kano kano ka wit ka wa. U Rangbah Skor Jala ha ryngkat ki symbud nongkñia ki la pyndep ïa ka niam ka rukom katkum ki riti dustur ka Raij Mawbuh.

Hadien ka lehniam ha law nongthroh, ka la don ka jingpyndonburom ia ka mei mawbuh ha ka ba la don ka kñia ka khriam ka peitdak ka peitshin da ki tymmen ki san ban ioh ia ka kyrkhu ka kyrdoh na ka bynta ka jingleit kiew pynehrngiew paidbah ha ka 2 tarik Rymphang. Ha ba la biang nadong shadong baroh ki ba la sakhi ha kata ka lehniam lehrukom ki la leit pynsum ïa u maw mei Mawbuh ba la lam khmat da ki tymmen ki san, u Syiem Hima Mylliem, Ainam Sing Syiem bad ki basan ki bakhraw.

Mar ïa dep ka niam ka rukom ha ka Raij Mawbuh, ki tymmen ki san ki la kiew sha duwan ha kliar lum Sohpetbneng na ka bynta ka leh niam leh rukom ka ba kut artat, ha ka ba la shat pylleng ha ryngkat ka khan ka bishar bad ka kyrkhu kyrdoh ïa u khaweh khawkdang, shwa ban sam bhah sha ki paidbah.

Naduh ba la sdang ka kiew pyneh rngiew ha u snem 2000, ïa u khaweh khawkdang la ju ai da ka Syiemsad Hima Mawbuh ha ryngkat ka kyrkhu kyrdoh bad ba la nam ha ka dorbar ki longsan mansan Raij na ka kur Rangslang, Shylla, Manar bad Shadap. Katkum kane ka peit dak peit shin ka la paw ba ki blei ki ryngkew ki basa kin don ryngkat ban synran synriah ia u paidbyllien u ban wan u ban poi ha katei ka sngi da ka suk ka saiñ.

Ka kiew pynehrngiew lum sohpet bneng ka long ruh ka bynta jong ka Dorbar Raij Mawbuh ha ka Hima Mylliem ha ryngkat ka Seng Khasi Kmie ba la kitkhlieh bad pynïaid da ka Lyngwiar Korbarkam ne ka Lum Sohpetbneng Committee.

Hadien da ki phew snem ba ka Raij Mawbuh ka khlem lah shuh ban bteng ïa ka niam ka rukom, kumta la shimti noh da ka Seng Khasi Kmie katkum ba la maitphang ka Seng Khasi Mawlai hadien ba la tuklar da uwei na ki tymmen ki san ka Seng Khasi, u Bah H O Mawrie bam kwai ha dwar U Blei.

Don ki riewtymmen riewsan ki ba ïathuh ba ha ka por ba synshar u Syiem Sati Raja, dang don u khla ha khlaw ba lah ban ïohi paidbah ba u synran kum u ryngkew basa ha ka por ba long ka niam ka rukom jong ka Raij Mawbuh. Kumta naduh ka snem 2000 la phuh la phieng ka kiew pynehrngiew Lum Sohpetbneng ba la prat lynti da u Bah Sumar Sing Sawian bad Bah Dipshon Nongbri u ba dei artat u Khnong Rynsan ba mynta.

Lah ban pynkynmaw ba ka Law Nongthroh ha syntai Lum Sohpetbneng ka dei ka thaw ba la lapdien da ki stadtip ka longbynriew manbynriew bad ka sengshnong sengthaw ba la lamkhmat da u Dr Marco Mitri ha ka ba la shem ba don ki hynñiew tylli ki mawbah kur, ki mawbynna, bad byllai ki nongra marmaw bad marnar ba naduh mynnor ba la pyndonkam ki longshwa manshwa.

Kumta ka don ka sakhi katkum ka stadtip  ba mynta ban pynskhem ïa ka khanatang Sohpetbneng ha ka ba la ngeit ba ki khunbynriew Hynñiewtrep ki wan hiar na bneng na ka tangnub tangjri lyngba ka jingkieng ksiar Lum Sohpetbneng.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet