La shah  jied biang ia u bah Pyndapborthiaw  Saibon kum u president ka party KHNAM

Shillong Jylliew 03: Ka Khun Hynniewtrep National Awakening Movement (KHNAM) mynta ka sngi kala pynlong ia ka jingialang pidbah ba dei ki nongkit kam jong ka party ban jied ia ki nongkit kam kiba thymmai na ka bynta ka samoi trei kam jong u snem 2023-2026.

Ha kane ka jingjied ia ki nongkit kam jong ka party na ka bynta u snem 2023-26, u bah Pyndapborthiaw Saibon u la shah jied biang kum u President ka KHNAM, u bah Thomas Passah kum u Working President nalor kiwei de ki dkhot.

U Working President u bah Thomas haba kren sha ki lad pathai khubor, u la ong ba ka party  ha kane ka jingialang ka la iakren halor ki mat kiba la buh ha ka kular elekshon naduh u snem 2002 ba la seng ia ka KHNAM bad kiwei de ki mat ki bym pat shym la lah ban treikam kum ka mat Inner Line Permit (ILP).

U bah Thomas u la pynpaw ia ka jingsngewsiih namar naduh u 2019 haduh mynta ym shym la don ba la kren shuh ia ka mat ILP bad kane ka pynpaw shai kdar ba ki 60 ngut ki MLA kiba pas ia ka rai halor ka ILP bad ka jingpynrung ia ka ktien Khasi ki la shu leh tang ban pynthohbria ia u paidbah namar ba kim shym la shimkhia.

Ka party kala  ioh ia ka ‘sorkar Resolution’ suda ym ia ka sorkar kaban wanrah ia ka ‘Solution’ . Na ka liang jong ngi, ngin sa thoh sha ka sorkar ban pynbor ba kan ai jubab haduh hangno la poi ka jingdawa ILP bad ka jinngpynrung ia ka ktien Khasi ha ka khyrnit ba phra jong ka riti synshar ka ri.

Halor ka jingwanrah  ka sorkar ia ka MRSSA, u la ong ba kane kan nym lah ban tehlakam ia ka jingrung kyrtlep ki mynder ha kane ka jylla bad dei tang ka ILP kaba lah ban tehlakam ia ka jingrung beain ki briew ha kane ka jylla.

Na ka liang ka seng ka la pynrem jur ruh ia ka sorkar MDA-1 halor ka jingmih bun ki kynrum kynram haba iadei bad ka jingpynbeit jaka khappud jylla ha ka Phase-1 bad na bynta kane ka jingpynbeit jaka ha ka phase-2.

Ka ladep phah khubor sha ka sorkar ba kadei ban kynthup lang ia ki nongshong shnong baroh ha ka Committee kynthup naduh ki Rangbah shnong, ki Daloi, ki Syiem bad wat ki trai jaka ruh.

Ka party KHNAM kan sa phah shithi sha ka sorkar jylla ba ki riew shemphang na rilum Khasi Jaintia Garo kidei ban don bynta ha ka Expert Committee na bynta ban pynbeit ia ka Reservation Policy.

Haba kren sha ki lad pathai khubor hadien ba la wai ka jingialang jong ka General Council, u bah Thomas Passah u la ong ba ha ka jingialang jong ka Committee jong baroh ki seng Sain pyrthei dang shen, Ka Chairperson jong kane ka Committee ka la ong ba ha kane ka jylla ym don ia ki Expert bad hap ban wanrah na shabar.

Kane ka la pynartatien shuh shuh ia ngi namar ki briew ba nabar kin wan ban rai bad halor kane ngin phah ka shithi sha ka sorkar ba ki riewshemphang na kane ka jylla kidei ban don bynta kum u bah VGK Kynta, u bah Robertjune Kharjahrin, ka kong Patricia Mukhim nalor kiwei de kidei ban don bynta ha kane ka Expert Committee.

Ha kajuh ka por, u la ong ba ha kane ka taiew ban wan, na ka liang ka seng kan sa phah ia ka shithi khatduh sha ka sorkar jylla ba kadei ban pynduh noh ia ka jingthep kam lyngba ka ‘Personal Interview’ khnang ba ka jingthep kam kan long kaba khuid ba suba khlem da donkam pisa.

Lada 23 tylli ki jylla ha kane ka ri ki la pynduh ia ka Personal Interview kan eh aiu ia kane ka jylla  ba kan pynduh ia kane ka eksam lyngba ka Personal Interview hynrei ka jingpynlong ia kane ka eksam ka iatyngkhuh bad ka jingiohnong ka jong ki.

Namar kane ka daw ki shah teh shah khum bad ka seng kan sa shim da kiwei ki lad ki lynti lada ka sorkar ka dang leh kuman halor kane ka bynta la ong u Working President ka KHNAM u bah Thomas Passah.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet