Shillong, Nailur 04:Ki nongtrei ka MeECL hapoh jong ka lama jong ka seng MeECL Progressive Workers Union (MPWU) la shai ka sngi kin sdang ban beteng biang ia ka jingiakhih jong ki da kaba shong kyllain mungor ha ophis ba ha khliehduh ha Lumjingshai.
U bah Mantiphrang Lyngdoh haba kren ha u SP News Agency la ong ba kin sdang ia ka jingiakhih da kaba shong kyllain mungor kan long ha ka por 11.00 baje mynstep haduh ka por 3.00 baje noh phai sngi ha phyllaw jong ka ophis MeECL ha Lumjignshai.
La iathuh ba ki bor ba pyniaid ia ka MeECL kila phah ia ka jingthoh sha ka seng bad kidaw kaba kila pyni ka long ba ki dang peit bniah ia ka jingdawa bad ka daw ka long ba ka don ka jingduna pisa, kum kane ka jingjubab la ioh naduh u snem 2017 kaba kila sdang ia kane ka jingdawa ka jong ki.
Kiba trei kontrak, kiba trei sngi bad ki nongap pahara kiba la shim na ka tnad Home Guard jong ka sorkar baroh ki don hapoh ka MeECL 2300 ngut, la ong ba ka jingiakhih kan sdang la shai ka sngi bad kin bteng haduh ka 16 tarik mynta u bnai ha katei ka juh ka jaka ha ophis jong ka MeECL.
Kum ka seng kim hun ia ka jubab jong ka sorkar halor ka jingdawa ka jong ki ban ithuh noh kum ki nongtrei ba pura jong ka ka MeECL ia kito kiba la trei palat ia ka shiphew snem hapoh ka Corporation, dei na kane ka daw ba kum ki nongtrei kim banse ban ia bteng ia ka jingiakhih.
