New Delhi, Jylliew 07: Ki Public Sector Bank kin pynlong ia ka prokram kaba heh bha kum shi bynta ka Azadi Ka Amrit Mahotsav (AKAM) lashai ka sngi, ka 8 tarik u Jylliew, 2022.
Baroh ki distrik ha ka ri ki la kloi ban pdiang ia ki briew kiba don jingkylli shaphang ki lad ioh shim ram bad ka jingrung kyrteng hapoh ki skhim bapher bapher jong ka Sorkar. Kine ki prokram ban pynlong ha ki distrik ki dei ba pyniaid da baroh ki Public Sector Bank bad ki State Level Bankers Committee (SLBC).
Da kaba kynmaw ia ka Credit Outreach Programme ha kylleng ka ri, ka Meghalaya ruh kan pynlong ia kane ha baroh ki distrik ban ai jingtip ia ki briew shaphang ki lad ioh shim ram bad ka jingpynrung kyrteng hapoh ki skhim Sorkar bapher bapher.
Kine ki prokram ki dei shi bynta ka jingrakhe kaba shi taiew jong ka tnat Finance (MoF) hapoh ka AKAM naduh ka 6 tarik haduh 12 tarik Jylliew, 2022. Ha ka sngi ba nyngkong jong kane ka jingrakhe ba shi taiew, la wan iashim bynta u Myntri Rangbah Duh ka ri, ha Vigyan Bhawan, New Delhi.
Ka jingthmu jong kine ki prokram ha ki distrik ka dei ban rah ia ka jingrakhe ia ka AKAM sha baroh ki bynta jong ka ri ha kaba ka don ka jingiashim bynta shitrhem jong ki nongtrei bad ki briew.
La bthah ia baroh ki SLBC ba kin pynlong ia ki prokram halor ki lad ioh shim ram, ka jingpynrung kyrteng hapoh ki skhim Jan Suraksha jong ka Pradhan Mantri Jeevan Jyoti Bima Yojana (PMJJBY), Pradahan Mantri Suraksha Bima Yojana (PMSBY) bad Atal Pension Yojana (APY), ka jingai jingtip ia ki briew bad ka jinghikai ia ki shaphang ki kam pisa bad ruh ban ithuh ia ki jingtrei shitom jong ki branch, ki BC bad kiwei kiwei.
