Shillong, Lber 01: Ka jingniew vote na ka bynta ka MDC, ia ki ar tylli ki iing dorbar jong ki District Council ka JHADC bad ka KHADC kan long la shai ka sngi bad na ka jingsngewthuh la ong ba ia ki Executive Committee ha kitei ki ar tylli ki District Council yn thaw da ki party kiba don lang ha ka sorkar MDA.
Ka jingiakren hapoh ki seng sain pyrthei khamtam ka UDP bad ka NPP kala dang iaid bad ka sah mynta ka long mano ban ialam ia ka EC, ki thymmei khubor kiba ia jan bad kine ki ar tylli ki party kila pynsngew ba ka shong ka jingjop bun eh ki MDC kaba yn sa tip la shai ka sngi ha dien ba la dep ban niew vote.
Ki lad khubor ki pynsngew ba lada ka UDP ka ioh bun ki MDC ban ia ka NPP kata ka party kan ialam ia ka EC lada ka NPP ka ioh kham bun ki MDC ban ia ka UDP ka NPP kan ialam ia ka EC, haduh mynta kam pat don kano kano ka rai hynrei kin dang ia ap ia ka jingmih na ka jingniew vote la shai ka sngi.
La sngewthuh ba hapoh jong ka JHADC kan jup bun ka NPP bad hapoh jong ka KHADC haduh mynta ym pat lah ban ioh ia ka jingtip kaba shai la kan bun ka NPP ne ka UDP. Kawei kaba thikna ka long ba ia ki EC ha kine ki ar tylli ki District Council yn thaw da ki party kiba don lang ha ka sorkar MDA.
