S
hillong, Iaiong 12: U Bah Prestone Tynsong myntri jong ka sorkar jylla, u la iathuh ba u myntri rangbah ka jylla u Conrad K Sangma bad ka kynhun myntri kin leit sha Delh ban ia kynduh ia ki myntri jong ka sorkar pdeng ban ia kren na ka bynta ban pynlait noh ia ka jingkhang tih dewiong ha kane ka jylla Meghalaya.
Haba kren ha ki nongthoh khubor ha dien ka jingialang jong ka kabinet, u Bah Prestone u la ong ba, ka kabinet kala ia kren sani bha ia kane ka kam bad na ka liang jong u myntri rangbah un leit la shai ka sngi sha Delhi ban ia kren bad ha dien kata yn sa ai ia ka jingkren hapoh ka iing dorbar thaw ain ka jylla ban ia shai ha kaba ia dei bad kane ka jingkhang tih dewiong ha ka jylla.
Ha kane ka jingialang jong ka kabinet kaba la long mynta ka sngi, kala shim ia ka rai ba kin nym wanrah shuh da kawei ka rai hapoh ka iing dorbar, ka sorkar kan leit ia kren bad ka sorkar pdeng halor ka rai jong ka iing dorbar kaba la shim da ka iing dorbar ha u snem 2015.
Ha kane ka jingiakren kaba la long mynta ka sngi la khat lang ruh ia u Advocate General namar ki don bun ki kyndon kiba ia dei bad ka ain. Ka Rai jong ka NGT ka long shai bha ba ba ka rai baroh ka shnong ha ka sorkar pdeng, lada ka sorkar jylla kala ioh ia ka rai na ka sorkar pdeng sa pyntip sha ka NGT ban leh ia kaba don kam.
Ka sorkar hapoh ka jingialam jong u Conrad kala shim khia bha ia kane ka kam namar kane kala ktah ia ka ioh ka kot jong ki paidbah ka jylla ha kiba bun ki liang. Na ka liang jong ka sorkar kala wad ki lad ki lynti baroh ha kaba ia dei bad kane ka kam khang tih dewiong ha kane ka jylla. Na ka liang jong u myntri u la kren shai ba ha ka juh ka por dei ban iada ia ka mariang.
Kiwei ki jingiakren hapoh ka kabinet mynta ka sngi ka long ha kaba ia dei bad ka tnad ka koit ka khiah lem bad kiwei ia kaba ka kabinet kam shym la shim kano kano ka rai namar la phah biang sha ki tnad sorkar ba kin peit bniah biang bad sa wan rah biang sha ka kabinet ban shim ia ka rai.
