Shillong, Naitung 15: Ka Meghalaya Land Forest Owners Association (MLFOA), ha ka 15 tarik July 2019, ha ka jingialam u Bah John F Kharshiing, Adviser, MLFOA bad u Bah R S Syiem, Joint Secretary, MLFOA, ki la leit ai dorkhas ha u Bah Lakmen Rymbui, Minister, ba dei peit ia k tnad khlaw jong ka sorkar Meghalaya.
Kane ka jingleit ai ia ka dorkhas ka long ban kyrpad lyngba jong u ba ka Sorkar Meghalaya kan shim khia namar ka bishar Supreme Court dang shen ban pynbeit ia ki Ain kiba bun kum ka Forest Conservation Act 1980, Forest Conservation Rules 2003, ka Indian Forest Act 1927, ka Assam Forest Regulation 1891, Forest Based Industries (Establishment & Regulation) Rules 1998, Indian Registration Act 1908, bad bun kiwei kiwei ki Act ki Rule kiba tyngkhuh bad ka Riti Dustur jong ka rukom im ka rukom bat khyndew jong ngi ki paid riewlum Khasi Jaintia bad Garo.
La ong ba ki kyndon ain baroh ka iaid lait na ka kyndon baar jong ka Annexed Agreement ka Instrument of Accession 17 August 1948, ia kaba, ha katei ka dorkhast la suh lang ha ka dorkhast ka rai Dorbar ka Assembly ka official Meghalaya Assembly Resolution kaba 13 April 2000 kaba dawa na ka Sorkar India ban pynbeit lane weng ia kitei ka Act ki Rule trei dieng trei khlaw, plie kharkana sawmill, katkum ka para 12A(b) Sixth Schedule ka Constitution Ri India.
Hynrei haduh kine ki sngi naduh ba myjur ia katei ka Resolution Assembly ki Khadwei ngut ki Minister Forest barim 2000 – 2017 ka jylla kim pat lah ban weng ia kine ki jingeh jong ki trai khyndew ki trai khlaw bad la kyntu ia u Bah Lakmen Rymbui, Minister Forest Meghalaya, uba dei u Minister uba khadar ba un shim khia ban thaw lad ban weng ia kane ka jingeh.
La pynsngew ba namar ka jingbym shai ka Ain jan baroh ki 500 tam ki saw mill ki long beain, namar kitei ki Act ki Rule India ki trai khlaw kim lah ban plie kharkhana dieng ha jaka la jong namar hap plie ha ki Industrial Estate katba ka Sorkar pat kam don jaka la jong.
Shuh shuh la pynsngew ha u Minister Forest ba u Dr Donkupar Roy, mynba u long Chief Minister u la thung ia ka Committee kaba kynthup ia ki Autonomous District Council, ki dkhot MLFOA bad ki officer ka tnad Forest ha ka 13 June 2008, bad katei ka Committee ka la ai ia ka kaiphod ha kaba la pyni ia ka jingduhnong ki paidbah bad ka Sorkar Jylla namar katei ki Act ki Rule ka kot haduh 18 crore shi snem. Kumba long mynta baroh ka long ka jingtrei beain kat shaba ngi phai.
Hynrei la pynsngew ba namar ka rai bishar ka Supreme Court dang shen kaba ithuh ia ka jinglong trai ki paidbah khasi, Jaintia bad Garo, ka Sorkar Meghalaya ka la dei ban pynbeit ia kitei ki Ain kiba khang lad ia ki paidbah ban plie sawmill ha ki jaka kiban pynsuk ia ki paidbah, kumba ka long mynta baroh kawei ka East Khasi Hills ka Sawmill ba la ithuh ka Ain dei tang ha Umiam Industrial Estate, kumjuh ka West Khasi Hills baroh kawei ithuh tang ka Industrial Estate ha Nongstoin.
La pynsngew ruh ha u Minister Forest ba kane baroh ka long namar ka jingsah teng na ka liang ka Sorkar India bad lehse ban pyndep ia ki kyndon ka Instrument of Accession kaba ia soi bad mynjur hapdeng ka Sorkar India bad ki Khasi States.
Na ka liang u Minister, u la kular ban shim khia ban bishar bniah ia kane ka phang bad un sa pang jingshai na ka tnad Forest bad na ka tnad Law khamtam halor ka jingbym phah sha Delhi ia ka rai Dorbar Meghalaya Assembly Resolution kaba la rai da 60 ngut ki MLA. Ki rangbah ki la pyntip ha u Myntri ba ka tnad Forest ki la khot ia ki dkhot ka MLFOA ban ia kren halor ka jingthmu ban pynbeit ia ka Indian Forest Act 1927 ha ka 16 tarik July 2019 por 11 baje mynstep.
