Shillong, Nailur 26: Ki nonghikai kiba ialeh ia ka Exams Diploma in Elementary Education (D. EL. ED) ki la rai ban leit tur sha ka ophis jong ka NIOS Shillong ka ba don hapoh ka campus jong ka Directorate of Educational Research and Training (DERT) Shillong ha ka 28 tarik mynta u bnai ha ka por 10 baje mynstep.
Ia Kane ka rai la shim ha ka jingialang ba kyrkieh jong ki convener kiba na jaintia hills , east khasi hills, west khasi hills, south west khasi hills bad Ri Bhoi district kaba la long mynta ka sngi hadien ba ka NIOS kam lah ban pynurlong ban pynbieit ia ki kynrum kynram ka result jong ka D. El. Ed final year jong u snem 2013 ka ba la pynmih ha ka 9 tarik mynta u bnai kumba la kular da u Assistant Director ka NIOS Regional Centre Guwahati u Piyush Prasad ha ka jingiakynduh bad ki dkhot jong ki trainees ha ka 14 tarik mynta u bnai hapoh Guwahati ban pynmih biang da ka result kaba thymmai hapoh shiphew sngi kaba la kut artad naduh ka 24 tarik mynta u bnai.
Kumta kila kyrpad ia baroh ki trainees naduh ki nonghikai SSA, Adhoc, deficit bad jong ka sorkar ban iamih paidbah ha katei ka sngi ki buh ruh ka jingkyrpad ia ka Meghalaya SSA Schools Association (MSSASA) ban iarap lem ban tuklar halor kane ka bynta kumba ka la dep buddien naduh ki por ba la dep shwa ban pynmih ia ka result. Kane ka long katkum ka khubor ba la pynlait da ki nongialam jong ki nonghikai u Bah N Dkhar bad u Bah JJ Lyngkhoi.
