Shillong, Nailar 17: Kiba ha iing ha sem, ki paralok, ki para marjan marpa, khamtam eh ki kmie ki kpa jong ka samla Clara Bansharai Khongsit kila iam paid dohnud ha ba la poi ka met jong ka khun ba ieit ba thoin jong ki ha iing sah ha Upper Lumparing mynta ka jan miet.
Kane ka samla Khongsit ka trei hapoh jong ka Private Ailine Indigo, kum ka Air Hostess bad la sngewthuh ba ka long kum ka nongialam hapoh ka jingtrei kam ka jong ka, hynrei kane kane ka jingjia ba sngewsih kala wanlap kynsan ha kane ka jingim jong kane ka samla kaba kiba ha iing ha sem ki dang don shibun ka jingkyrmen na ka.
Haba ia dei bad kane ka jingjia la sngewthuh ba na ka liang jong ki pulit jong ka Kolkatta kila iaid sha khmat ban wat bniah ban lap ia ka jingshisha kaba la wanrah haduh ba kane ka samla na kane ka nongbah Shillong kan duh ei ia la ka jong ka jingim.
