Shillong, Jylliew 06: Ka seng JSU seng kmie mynta ka sngi ka lah kynduh khnang bad u Myntri badei khmih iaka Art and Culture jong ka sorkar jylla u bah Sanbor Shullai ,ka seng ka lah ai daka dorkhas ban dawa na ka sorkar jylla lyngba ka tnat Art and Culuture ba kadei ban shna pynbha noh iaka District librabry bad ka auditorium hall kaba don ha Jowai.
Ha kane ka jingiakynduh ia u mytnri ka tnad pynneh pynsah riti dustur u bah Sanbor Shullai ka JSU kala kdew ba kane ka hall ka lah sniew lut haki liang baroh naduh ka rong haduh ka jaka shong bad haduh ki kynroh ing bad ki light shapoh ka hall bad ka seng ka dawa ban shna pynbha noh kumba leh iaka District library cum Auditorium ha Tura bad na ka liang u myntri u lah kular ban shim khia ban pynbha iakatei ka hall kat kum ka jingdawa ka seng.
Ka seng JSU ka lah dawa ruh na ka sorkar lyngba u myntri ka tnat Art and Culture ban buh kawei ka District Library bad Auditorium hall ha East Jaintia Hills lane ha Khliehriat namar haduh mynta ki paitbah bad ki tnat sorkar bapher bapher ki shem jingeh ban ioh iaka hall kaba biang paka ban pynlong jingialang bad ki khynnah pule ka thaiñ kin ioh jingmyntoi na ka Library.
Ka seng ka lah dawa ruh na u myntri ban plie paitbah noh iaka Amphitheatre lane ka jaka pynlong tamasa ne rynsan paitbah bapher bapher kaba don ha Police Reserve Saliny Colony Mihmyntdu-Jowai bad kane ka jaka kadei kaba lah dep ban shna lah slem ki por hynrei ka seng ka lah ong ba na ka liang kiba dei peit kim peit bha iaka bad ban plie paitbah noh ban ioh pyndonkam ki paitbah.
Ha kane ka jingiakynduh ka JSU mynta ka sngi kala ong ba kane ka jaka ka lah kylla long pynban ka ing jah bad bun rukom ki jingsniew ki mih nangne ka jaka naka liang u myntri u lah ioh ban iakren bad u incharge ka District library Jowai bad u lah bthah iaki ban leh iakaba don kam bad u lah ong un sa wan ban wan peit hi iakane ka jaka kaba kylla ing jah.
Ha kane ka jingiakynduh na ka liang jongu myntri ka sorkar jylla u la kular ban pynshna bha lada biang ka fund kumba long ka Tura DLA bad yn plie noh iaka Amphitheatre bad yn buh noh sa u wei u Mot sah nam u Woh Kiang Nangbah ha Lad College lada ioh jaka na ka tnat Transport kumba dawa ka seng JSU.
