Shillong, Iaiong 02: U Myntri ba dei peit ia ka tnad sam bam jong ka sorkar jylla u James K Sangma mynta ka sngi u la iathuh ba ka sorkar kala bthah ia baroh ki Deputy Commissioner ban thaw ia kynhun peitngor ba kin leit jurip syndet syndet sha ki dukan ban lap ia kiba pynkiew dor.
U myntri u la ong ba lada lap ia kiba leh kumta yn pynshitom ia ki nondie hapoh ka kyndon kaba 7 jong ka ain Essential Commodities Act, 1955 bad ka kyndon kaba 3 lai jong ka Black Marketing and Maintaince and supply of essential Comodities Act 1980.Na ka liang jong ka sorkar kan nym map iano iano ruh ia kiba pynkhein ia ka ain.
U myntri ka tnad sam bam u la kyntu ruh ia ki paidbah ba lada ki don kano kano ka jingeh ha kaba ia dei bad ki marbam kin pyntip sha une u number 1967 hapoh jong ka tnad sam bam, la kyntu ia ki paidbah ba kin wan sha khmat ban pyntip sha u tei u number ba ka sorkar kan tip khnang ba ka sorkar kan lah ban pynbeit.
Ha ka juh ka por u myntri u kyrpad ia baroh, naduh ki MP, ki MLA, ki MDC, ki seng bhalang, ki jaidniam baroh bad ia ki paidbah nongshnong shnong ba kin pynsngewthuh paidbah ban bud ia ka ‘Social Distancing” bad to long kiba kylluid mynsiem ban iarap para briew ha kum kane ka por.
U myntri u la ong ba sngewthuh ba kane ka dei ka por ba baroh ki ia kynduh ia ka jingeh, la kyntu ia baroh ban long jai jai bad haba leit ban thied jingthied ym dei ban don kano kano ka jingsyier thied da kaba jai jai. Ka sorkar kala trei miet bad sngi ban peit ba ki nongshong shnong kin nym ia kynduh jingeh.
