Shillong, Nohprah 24: Kiba lah don Aadhaar bad kwah law noh mynta, phi lah ban file noh da ka affidavit ha khmat ka Supreme Court; kiba la shah pynbor ha kiba bun rukom hano hano ba dei ban don Aadhaar, kiba lah ban dei ki bor sorkar bapher bapher, ki bank, ki bor pyniaid shnong bad kiwei, ki ruh ki
lah ban file affidavit.
Kiba la shah pyntieng pynsmiej da kumne kumtai bad ba kin duh ia u khaw, ka shini rashon bad kiwei ki jingmyntoi sorkar lada kim don Aadhaar, kynthup ban duh rung skul lane bad kolej bad duh bai bam, ma ki ruh, ki lah ban file
affidavit; kiba la ioh pension hynrei shah byrngem ne pyntieng ba kin duh ia la ka hok ioh pension namar ba kim don Aadhaar, ma ki ruh, ki lah ban file affidavit. Kiba la shem la mad ba ka khlem trei kam kata ka Authentication Machine bad kiwei ki jaid tiar pynrung Aadhaar, ki ruh, ki lah ban file affidavit.
Na ka bynta kane, la pynbeit ba ha ka Sngi Hat Majai, 26 tarik U Nohprah 2017, ha ka por 10 baje mynstep, yn plié lad ia kiba kwah file affidavit halor kitei ki phang haneng ia kaban ai jingiarap ia ki bad ba kin ioh leh ia kaba
donkam baroh shwa ban phah ia ki dulir sha ka Supreme Court ha ka por kaba biang. Ka jaka kan long ha Ophis ka KSU (Central Body), Jaiaw, Shillong.
Ka Meghalaya People Committee on Aadhaar (MPCA) pynkynmaw ruh ba la pynjlan ia ka tarik ban pyniasoh ia u mobile number, bank account bad na ka bynta kiwei kiwei ki scheme ioh jingmyntoi na ka sorkar (kiba don kumba 100 tylli ei ei) sha ka 31 tarik U Lber, 2018. Hynrei na ka bynta ban plié account thymmai ha ka bank bad ban ioh mobile thymmai, kato ka jingpynbna tarik khadduh mynshwa ka neh, kata, lada phim lah ban ap ia ka RAI pynkut ka
Supreme Court halor ka kam Aadhaar. La ong u Bah Auguster Jyrwa Rev. K. Pyrtuh Rev. Dr. P. B. M. Basaiawmoit ha ka khubor kaba la phah mynta ka sngi.
