Shillong, Jymmang 11: U Symbut Myntri Rangbah ka jylla u Bah Prestone Tynsong u la ong ba lada ka Congress ka kwah ban siew balei kan wan sha ka sorkar, leh se ha ka dur jong ka Meghalaya Chief Minister Relief Found lane ban kylli katno ka jinglut ka jingsep hynrei ban shu kren tang ha ki kotkhubor kan kut lane ki don kiba ha iing ha sem jong ki kata ka long da kumwei pat.
Lada ka party Congress ka don shisha ia kata ka jingkitkhlieh ai kin wan ryngkat ka jingpynkhreh bad na ka liang jong ka sorkar kan ai ka burom ia ki, la ong ba namar bun bah ki seng bhalang, ki seng niam, ki shnong ki thaw ki ai jingiarap ia ka sorkar ha ka kyrteng jong ka Chief Minister Relief Found.
Haba jubab ia ki jingkylli halor ka shithi kaba la ai sha u Chief Secretary jong ka jylla na ka seng Congress kala poi ne em sha ka sorkar, na ka liang jong u symbut myntri rangbah u la ong em ym pat iohi.
Ka meghalaya Pradesh Congress Committee (MPCC) ha ka 7.05/2020 mynta u bnai kala phah ia ka shithi sha u Chief Secretary jong ka jylla u MS Rao ba ka party Congress ka kloi ban siew ia ka bai rel jong ki briew kiba wan phai sha la ki shnong kumba la bthah da ka national president jong ka party ka Sonia Gandhi.
Ha ka shithi kaba la thoh sha u Chief Secretary ka la kdew shai ba ka party Congress ka kwah ban ioh ia ka jingkhein na ka sorkar katno ngut ki don ki nongbylla kiba don sha bar jong ka jylla kiba kwah ban wan phai sha la shnong. Khnang ba kin ioh ban thep ia ka pisa bai rel ha ka akkount jong ki.
Ia ka shithi bala phah sha u Chief secretary jong ka jylla la soi da u Working Presdient jong ka MPCC u bah James S. Lyngdoh. Kaba pynlong lyngoh ka long ba u Deputy Chief Minister u ong ba ka sorkar kam pat ioh ia kane ka shithi.
